web counter
LEXO PA REKLAMA!

SHKARKO APP

App Store
Google Play

Gvozdenovic preket pas fitores, Gjoka: Do flas me presidentin, Skënderbeun e dija ndryshe

20 Dhjetor 2024, 20:39, Sport CNA

Gvozdenovic preket pas fitores, Gjoka: Do flas me presidentin, Skënderbeun

Trajneri Ivan Gvozdenoviç mori fitoren e parë në stolin e Elbasanit, pasi mposhti Skënderbeun me rezultatin 2-0.

Një sukses i rëndësishëm për verdheblutë, por për teknikun serb, emocionet në këtë takim ishin të përziera. Gvozdenoviç gjeti përballë ish-skuadrën e tij, nga e cila u largua pak javë më parë.

Në prononcimin pas ndeshjes, trajneri u shfaq i prekur, për shkak të të kaluarës së tij te Skënderbeu.

“Ishte shumë e vështirë për mua. Isha shumë i emocionuar. Jam gjysmë i kënaqur dhe gjysmë i mërzitur. Jam i lumtur, sepse fitorja ishte shumë e rëndësishme. Jam i mërzitur për Skënderbeun dhe situatën aty. Skënderbeu ka nevojë për pikët. Ishte e vështirë për mua. Edhe kur fola me lojtarët e Skënderbeut para ndeshjes, ndjeva diçka brenda. Kjo është puna. I uroj shumë suksese Skënderbeut në vazhdimësi”, u shpreh Gvozdenovic.  

Në krahun tjetër, trajneri i Skënderbeut, Ernest Gjoka, ishte i zhgënjyer, duke thënë se ka gjetur shumë probleme te skuadra korçare. Tekniku bardhekuq theksoi se do të kërkojë ndryshime nga drejtori dhe presidenti.

Sipas Gjokës te Skënderbeu gropa është e madhe dhe shumë ndryshe nga ajo që shihej nga jashtë.

“Nuk mund të ndjehesh mirë kur humb. Ishim përgatitur për të bërë diçka ndryshe. Goli i parë, ishte një gabim që duhet të kishim shmangur. Skuadra ka shumë probleme. Kam munduar të ndryshoj shumë gjëra gjatë kësaj kohe. Nuk po e gjej dot zgjidhjen. Do flas me presidentin dhe drejtorin për ta gjetur një zgjidhje. Dua një ndryshim të madh në këtë skuadër, jo në sensin e lojtarëve, por në përgatitjen psikologjike.

 Nga jashtë e mendoja ndryshe Skënderbeun. E mendoja një skuadër me shumë cilësi. Gropa që kemi gjetur është shumë e madhe. Mesa duket gropa po na tërheq poshtë dhe nuk na lë të ngjitemi lart”, deklaroi Gjoka.

Pas humbjes me Elbasanin, Skënderbeu renditet në vendin e fundit në renditje me vetëm 15 pikë të grumbulluara.





Lajmet e fundit nga