web counter
LEXO PA REKLAMA!

SHKARKO APP

App Store
Google Play

Godet Partizani, sulmuesi 20-vjeçar zbarkon te “demat”

12 Janar 2023, 09:27, Sport CNA

Fabian Shahaj mund të quhet afrimi i parë i Partizanit në merkaton e janarit. 20-vjeçari, i cili është nën kontratë me ADO Den Hag, ka mbërritur ditët e fundit në Tiranë, ku i është bashkuar skuadrës së Partizanit. Sulmuesi ishte pjesë e futbollit holandez, kishte luajtur 46 minuta me ADO Den Hag në sezonin e kaluar.

I riu luan me skuadrën U-21 të këtij klubi, por tashmë kërkon një eksperiencë si profesionist dhe ka zgjedhur Partizanin, që ka nevojë për alternativa në majën e sulmit dhe Shahaj pritet të jetë një i tillë, teksa në rast se bind, siç ndodhi me Skukën një vit më parë, ai mund të ketë shansin të shndërrohet në një titullar absolut.

Ditën e djeshme Shahaj ka kryer stërvitjen e parë me fanellën e kuqe. Ai është vendosur nën urdhrat e trajnerit Kolela dhe në ditët në vijim pritet që marrëveshja, e bazuar në një huazim deri në fund të sezonit, të bëhet zyrtare dhe më pas publike.

Shahaj është rritur si futbollist në Holandë, ku ka luajtur në ekipe të ndryshme si fëmijë. Pavarësisht se ai ka edhe pasaportë holandeze, ka vendosur të përfaqësojë Kombëtaren e Shqipërisë, ku është grumbulluar disa herë nga ekipet zinxhir. Shahaj është një qendërsulmues tipik, i gjatë 1.93 metra dhe një favor i madh është fakti se ai mund të luajë me të dyja këmbët. Te Partizani ai pritet të konkurrojë për një vend titullari me Mensah, Carën apo edhe Hotin në rastet kur skemat ndryshojnë.





Lajmet e fundit nga