E fundit!

17:51 Aktualitet

Helmimi i studentëve/ SORI-AL: Asnjë konfirmim nga institucionet, kush mban përgjegjësi për dëmin ndaj biznesit

Kompania SORI-AL përmes një deklarate zyrtare bën me dije ...

Gjykata "trondit" Barcelonën, Olmo mund të largohet falas

27 Dhjetor 2024, 15:52, Sport CNA

Barcelona po përballet me një nga periudhat më të vështira të viteve të fundit, lidhur me çështjen e regjistrimit të lojtarëve dhe problemet me rregullat e “Fair Play Financiar”. Situata është përshkallëzuar pas vendimit të fundit të Gjykatës, e cila ka dalë kundër klubit katalanas për padinë që Barcelona kishte ngritur ndaj La Ligës, lidhur me regjistrimin e Dani Olmos.

Fantazisti spanjoll, i cili u afrua nga Lajpcig gjatë merkatos së verës për shumën prej 60 milionë eurove, tani ndodhet në një pozicion të ndërlikuar. Olmo do të jetë një lojtar i lirë nga 1 janari dhe do të ketë mundësinë të zgjedhë një skuadër të re pa ndonjë detyrim ndaj Barcelonës, në bazë të klauzolës së vendosur në verë. Kjo ka krijuar një situatë emergjente për klubin, i cili po lufton për të siguruar regjistrimin e tij përpara se të jetë shumë vonë.

Gjykata vendosi në favor të La Ligës, duke argumentuar se Barcelona nuk ka respektuar rregullat, të cilat janë të detyrueshme për klubet spanjolle.

Pas këtij vendimi, Barcelona ka vendosur të apelojë sërish, duke e çuar çështjen në Gjykatën e Shkallës së Parë. Një vendim për këtë apel pritet të merret më 30 dhjetor, dhe në rast se gjykata konfirmon qëndrimin kundër klubit, atëherë Dani Olmo do të jetë i lirë të largohet falas në merkaton e janarit.

Barcelona ka kohë deri më 31 janar për të gjetur një zgjidhje, një periudhë tepër e shkurtër duke marrë parasysh kompleksitetin e çështjes. Klubi duhet të bëjë lëvizje të kujdesshme, duke kërkuar të përmbushë kërkesat e La Ligës dhe të zgjidhë mosmarrëveshjet me autoritetet ligjore, për të shmangur humbjen e një lojtari të rëndësishëm.

Dani Olmo, një nga talentet më të spikatur të futbollit spanjoll, në verë u pa si një përforcim kyç për projektin e Barcelonës në sezonet e ardhshme. Megjithatë, rreziku për të humbur atë falas ka shkaktuar një valë kritikash ndaj drejtuesve të klubit. Menaxhimi financiar dhe strategjik i Barcelonës ka qenë në qendër të kritikave prej kohësh, dhe kjo çështje vetëm sa i ka shtuar presionin mbi bordin drejtues.

Nëse Barcelona dështon të zgjidhë këtë situatë brenda afateve të përcaktuara, klubi do të përballet jo vetëm me humbjen e një lojtari të klasit botëror, por edhe me një goditje të rëndë ndaj reputacionit të tij.