Rriten çmimet e fruta-perimeve në Korçë/ Pensionistët në vështirësi për përballimin e jetesës

30 Mars 2026, 13:52, Sociale CNA

Rritja e çmimeve të fruta-perimeve në tregun e Korçës po rëndon çdo ditë e më shumë buxhetet familjare, veçanërisht për pensionistët.

Brenda një periudhe shumë të shkurtër kohore, produktet bazë kanë pësuar shtrenjtim të ndjeshëm, duke e bërë gjithnjë e më të vështirë përballimin e përditshmërisë.

Sipas vëzhgimeve në terren, çmimi i specave ka arritur deri në 3.5 mijë lekë për kilogram, nga rreth 2.5 mijë lekë që ishte vetëm pak ditë më parë.

Në të njëjtin nivel janë rritur edhe domatet, ndërsa kastravecat kanë shënuar rritje nga 1 mijë në rreth 1.3 mijë lekë për kilogram.

Të moshuarit pensionistë shprehen të revoltuar për situatën, duke thënë se çmimet janë bërë të papërballueshme dhe se shpesh detyrohen të heqin dorë nga produktet bazë.

“Çmimet janë që të marrësh Ramën e ta futësh në dhe. 4 mijë lekë të vjetra ishte kilogrami i specave, 3 mijë e 500 domatja. Ku i hamë dot ne? Vaj më solli djali mua, se për këta nuk e përdor dot fare. Do na rrjepin dhe lëkurën.”

Të tjerë thonë se tashmë janë të detyruar të kufizohen vetëm te produktet më të lira, ndërsa ushqimet e freskëta i shohin vetëm në treg.

“Çfarë shporte të konsumoj unë? Marr vetëm kur dalin makaronat me ofertë. Ta shikosh domaten 3 mijë – 3 mijë e 500 lekë, ta shikosh të merren mendtë, jo më ta hash. 100 mijë lekë të vjetra marr pension. Ç’të bëj më parë, ujë, drita apo ushqime?”

Edhe gratë pensioniste tregojnë se shpesh dalin në treg vetëm për të parë çmimet, pa mundur të blejnë.

“Domatet e specat i shikojmë me sy kur shkojmë në pazar e u themi shitësve ‘të paktën na ngopet syri’. Marrim ndonjë gjë më të lirë, kaq mundemi.”

Ndërsa për shumë familje, alternativa mbetet kufizimi i konsumit dhe orientimi drejt produkteve më të lira.

“I shikojmë me sy e plasim me zemër. Marrim qumësht, ndonjë vezë, bëjmë supë. Me çfarë t’i marrim këto? Me 200 mijë lekë pension? Po ilaçet?”

Rritja e çmimeve në tregun e fruta-perimeve po kthehet kështu në një shqetësim të përditshëm për qytetarët e Korçës, të cilët kërkojnë masa për të përballuar kostot gjithnjë në rritje të jetesës./ CNA