web counter
LEXO PA REKLAMA!

SHKARKO APP

App Store
Google Play

Raporti i KLSH-së/ Shërbimi psiko-social mungon tërësisht në zonat rurale

26 Mars 2026, 19:59, Sociale CNA

Raporti i KLSH-së/ Shërbimi psiko-social mungon tërësisht

Një raport i fundit i KLSH ka nxjerrë në pah se në shkollat e arsimit parauniversitar në zonat rurale mungon tërësisht shërbimi psiko-social për nxënësit. Ekspertët e shohin këtë si shqetësim, sidomos kur flitet për bullizmin dhe dhunën që po përhapet mes nxënësve.

Në raportin e Kontrollit të Lartë të Shtetit thuhet se në 1/4 e shkollave të arsimit parauniversitar në vend mungojnë psikologët. Të dhënat e publikuara tregojnë se për vitin shkollor 2022–2023 janë regjistruar 2,750 raste dhune në sistemin parauniversitar. Raporti citon se në disa shkolla, kjo dhunë është bërë pjesë e përditshme – vetëm në një shkollë në Tiranë janë raportuar 90 raste gjatë vitit 2022–2023, ndërkohë mësohet se Durrësi është qarku me numrin më të lartë të rasteve të dhunës të raportuara.

“Institucionet përgjegjëse nuk garantojnë shërbim psiko-social të njëjtë dhe gjithëpërfshirës për nxënësit në shkollat e arsimit parauniversitar, për të mësuar në një mjedis të sigurtë dhe mbështetës. Një pjesë e shkollave, kryesisht në zonat rurale, nuk mbulohen me shërbim psikosocial. Kabinetet dhe mjetet ndihmëse mungojnë, por dhe kur ato gjenden, në pjesën më të madhe të rasteve nuk janë të dedikuara për specialistët e këtij shërbimi”, thuhet në raportin e KLSH.

Në raportin që merr në analizë vitin arsimor 2023–2024 janë angazhuar 824 punonjës, që përbën një rritje me 52% më shumë krahasuar me vitin 2020–2021, por sërish KLSH ngre shqetësimin se fëmijët me aftësi të kufizuar nuk përfitojnë shërbim në përputhje me kërkesat e përcaktuara në ligj.

“Procedurat aktuale të rekrutimit nuk garantojnë mbulimin e plotë dhe në kohë të vendeve vakante në shërbimin psiko-social. Ofrimi i shërbimit psiko-social për fëmijët me aftësi të kufizuara nuk kryhet sipas parashikimeve. Dokumentet strategjikë në fuqi paraqesin në formë të fragmentuar objektiva për shërbimin psiko-social, të cilat shpeshherë janë të mbivendosura”, thuhet në raport. /CNA





Lajmet e fundit nga