Adoleshentët, përballë modeleve/ Halimi: Duhen orientuar, psikologu paragjykohet

9 Dhjetor 2024, 19:27, Sociale CNA

Adoleshentët, përballë modeleve/ Halimi: Duhen orientuar,

Psikologia Arbilola Halimi

Informacioni që vjen online, ku përfshihen edhe rrjete sociale për shkak të mungesës së mekanizmve filtrues po bën që fëmijët të përballen me informacion që tejkalon edhe kufijtë e moshës e që shpesh bëhet i dëmshëm për shëndetin mendor, madje deri në sjellje agresive.

Për psikologen Arbiola Halimi, çështja e parë që duhet ngritur dhe duhet kuptuar është se cilat janë modelet që duhet të ndjekin fëmijët dhe cilat po ndjekin.

Në një intevistë për CNA TV, Halimi tha se duhet ndërhyrë në të gjithë zinxhirin informues për të mos lejuar fëmijët të përballjen me pasoja të rënda.

“Themelore është pyetja se kush janë modelet që po ndjekin dhe cilat duhet të ndjekin fëmijët? Modelet jo të mira, fëmija mund t’i ndeshi dhe është “blueprint” tek i cili duhet të ndërhyhet nëse duam vërtet që të na bjerë niveli i agresivitetit, implusivitetit që pjesërisht janë të shpjegueshme në adoleshencë, por jo atëherë kur marrin përmasa të tjera.

Ajo që po ndodh sot në shkolla është rënia e figurës autoritare të mësuesit. Shkollat janë kundrejt një presioni për të pasur imazhin e mirë tentojnë të mbulojnë problematika të cilat më pas vetëm rëndohen. Një tjetër gjë sa i përket rrjeteve sociale është se komunikimi online është një univers i madh, prandaj i kushtojmë rëndësi”, u shpreh ajo.

Halimi ndër të tjera vuri në dukje edhe një tjetër problem, paragjykimin ndaj trajtimit psikologjik.

“Adoleshentët kërkojnë ndihmë nga psikologu, por shpesh nuk gjejnë dakordësinë e prindërve. Këta të fundit nuk e mirëkuptojnë këtë pjesë ose kanë ato mekanizmat e mbrotjes që fëmija im nuk është për psikolog sepse gjithmonë është ajo ndjenja e fajit, mendojnë që janë ata problem dhe nuk kuptojnë që në një shoqëri të sotme me stilin kaq përshpejtues të jetesës, nuk është e paragjykueshme të kërkosh ndihmë te psikologu”, theksoi Halimi.

Rrjetet sociale dhe ndikimi që kanë te sjelljet e adoleshentëve ka bërë që në Shqipëri të nisË diskutimi për mbylljen e “TikTok”-ut, si një nga platformat që shihet si jo e përshtatshme për adoleshentët, në kushtet kur nuk ka mekanizma filtrues të informacionit./ CNA