Fëmijët dhe rrjetet sociale/ Halimi: Shkëputja e menjëhershme do të krijojë sjellje agresive

9 Dhjetor 2024, 19:03, Sociale CNA

Fëmijët dhe rrjetet sociale/ Halimi: Shkëputja e

Psikologia Arbilola Halimi

Rrjetet sociale dhe ndikimi që kanë te sjelljet e adoleshentëve kanë qenë jo pak herë temë debati në Shqipëri, madje së fundmi ka nisur edhe konsultimet për mbylljen e rrjetit social “TikTok”, i vlerësuar edhe si i dëmshëm për informacionin që ofron.

Në një intervistë për CNA TV, psikologia Arbilola Halimi foli për propozimin e kryeministrit Edi Rama për mbylljen e rrjeteve sociale.

Halimi tha se ekspozimi ndaj përmbajtjeve online dhe kryesisht nga rrjetet sociale është i dëmshëm, pasi nuk ekzistojnë mekanizmat e duhur mbrojtës.

“Janë disa pyetje që duhen ngritur. E para, nuk është çështja a është gjë e mirë apo e keqe shkëputja nga rrjetet sociale, por a është e dëmshme apo e padëmshme çfarë kontaktesh krijohen mes fëmijëve dhe këtyre rrjeteve sociale. Kur ta kuptojmë këtë, do të arrijmë në përgjigjen nëse mbyllja e rrjeteve sociale është e mirë ose jo.

Ne nuk kemi ndërtuar ende mekanizma për të kontrolluar apo ruajtur fëmijët nga kontaktet dhe përmbajtjet me të cilat ndeshen në rrjetet sociale. Ne nuk kemi mënyra dhe forma që të mbrojmë fëmijët nga kontaktet që kanë rrjetet sociale e më pas t’i ruajmë nga ndërveprimi me persona apo materiale, të cilat do të ishin të dëmshme.

Nga ana tjetër, është çështje që meriton diskutim, sepse shkëptuja nga “TikTok”-u, apo nga rrjetet sociale nuk është e thjeshtë, të paktën në kuptimin psikologjik, pasi duhet të studiohen të gjithë fenomenet e impaktit psikologjik, pasojat që do të shkaktonte te fëmijët.

Sigurisht që jemi pro, sepse duket qenë se nuk ka mekanizma të fuqishëm kontrolli për të siguruar mbrojtjen nga kontaktet online, por nga ana tjetër fëmijët janë njësoj të mësuar si të rriturit me përdorimin e rrjeteve sociale. Shkëputja e menjëherëshme do të krijonte ankth dhe sjellje agresive”, u shpreh ajo

E pyetur nëse sjellja agresive vjen vetëm nga rrjetet sociale apo duhet ta shohim edhe më gjerë situatën, duke përfshirë edhe sistemin arsimor, Halimi theksoi se janë të gjithë faktorë që ndikojnë./ CNA