E fundit!

09:19 Denoncim

Financimi i kullës së Ervin Matës/ Plug: Mbi 28 milionë euro autofaturime për kompanitë e lidhura me Vilma Nushin

Pas denoncimit të parë, emisioni Plug ka vijuar sërish inv...

Njerëzit që janë më aktivë gjatë natës, kanë më shumë gjasa të preken nga diabeti dhe sëmundjet e zemrës

30 Shtator 2022, 15:10, Shëndeti CNA

Foto ilustruese

A ndiheni në kulmin e fuqive tuaja fizike kur është në fakt koha për të fikur dritën dhe fjetur gjumë? Të dashur... “bufa”, siç ju përcaktojnë shkencëtarët që studiojnë orën biologjike, kujdesuni seriozisht për shëndetin tuaj. Sipas një studimi të botuar së fundmi në revistën “Experimental Physiology”, ata që duan të qëndrojnë në orët e vona të natës dhe të ndihen më vigjilentë në pjesn e dytë të ditë-natës e kanë më të vështirë përdorimin e rezervave të yndyrës për energji sesa ata që flenë më herët në mbrëmje dhe zgjohen herët në mëngjes. Akumulimi i yndyrës në trup, lidhet me një probabilitet më të lartë të problemeve kardiovaskulare dhe shfaqjes së diabetit.

Më thuaj kur zgjohesh dhe do të të them sa kalori mund të djegësh

Kronotipi ynë, që është moria e karakteristikave që përcakton kohën e ditës kur ne ndihemi më aktivë, ndikon në ritmet metabolike, është mënyra përmes së cilës trupi i njeriut i përdor rezervat që ka për të marrë energji. Shkencëtarët në Universitetin Ratxhers në Nju Xhersi klasifikuan 51 pjesëmarrës në “bufat” ose “larka”, sipas prirjes së tyre për të qenë më aktivë në mbrëmje ose në mëngjes.

Më pas ata studiuan për secilin, përbërjen e trupit të tyre, ndjeshmërinë ndaj insulinës. metabolizmin e yndyrave dhe karbohidrateve. Insulina është hormon i prodhuar nga pankreasi që i lejon qelizat të marrin sheqerin me ushqimin për ta përdorur atë si një burim energjie.

Një metabolizëm më efikas

Për një javë, vullnetarët në studim duhej të ndiqnin një dietë ushqimore të kontrolluar. Ata u ekzaminuan si kur pushonin, ashtu edhe pas dy seancave 15-minutëshe stërvitore rutinë, një e moderuar dhe tjetra intensive. U vu re se njerëzit që e përqendrojnë aktivitetin e tyre ditën, djegin më shumë yndyrë për të prodhuar energji si kur pushojnë ashtu edhe gjatë aktivitetit fizik.

Po ashtu, ata janë më të ndjeshëm ndaj insulinës, që është çelësi i futjes së glukozës në qeliza.

Nga ana tjetër, ata që janë më aktivë në mbrëmje janë më shpesh rezistent ndaj insulinës. Pra kanë një ndjeshmëri të dobët ndaj insulinës, që është paradhoma dhe karakteristika kryesore e diabetit të tipit 2. Trupi i këtyre të fundit preferon më shumë karbohidratetd dhe jo yndyrnat si formë energjie. Prandaj është më e lehtë që tek ata të grumbullohen yndyrnat e padjegura, duke çuar në mbipeshë, diabet dhe sëmundje kardiovaskulare.

Më mirë të parandalosh

Nuk është ende e qartë se nga se varen këto ndryshime metabolike. Por lidhja me njërin ose tjetrin kronotip, do t’i ndihmojë mjekët të kuptojnë se ndaj cilave sëmundje është më i rrezikuar një pacient, dhe kujt duhet t’i kushtojë më shumë vëmendje ky i fundit.

Për shembull, studimi zbuloi se zogjtë larka janë fizikisht më aktivë gjatë ditës dhe më të stërvitur, ndërsa bufat qëndrojnë më shumë pasivë. Marrëdhënia midis orës biologjike, llojit të metabolizmit dhe stërvitjes fizike ka nevojë të studiohet akoma më tej. Por nëse jeni një njeri që qëndron dhe punon zakonisht në orët e vona të natës, një lloj aktiviteti fizik shtesë është shumë pozitiv./ Përkthyer dhe përshtatur nga CNA.al