web counter
LEXO PA REKLAMA!

SHKARKO APP

App Store
Google Play

E fundit!

x

Sfida para dimrit me rritjen e çmimit të druve/ Pensionistët: Nuk na del hesapi, shteti të ndërhyjë

6 Nëntor 2025, 13:32, Sociale CNA


Teksa temperaturat kanë nisur të bien, shumë pensionistë në qytetet e vendit po përballen me një tjetër sfidë të afrimit të dimrit, pamundësinë për të siguruar dru zjarri. Çmimet janë rritur ndjeshëm, duke e bërë ngrohjen e shtëpisë një barrë të rëndë për ata që jetojnë vetëm me pension.

Në tregjet e druve, një metër kub kushton deri në 60 deri në 65 mijë lekë të vjetër, çmim që për shumicën e të moshuarve është i paarritshëm. Shumë prej tyre thonë se vitin e kaluar kanë paguar më pak se gjysmën e kësaj shume, ndërsa tani detyrohen të heqin dorë nga ngrohja ose të përdorin mënyra alternative si batanijet apo kondicionerët, që konsumojnë më pak energji, por ngrohin vetëm një dhomë.

“Unë jam vetë i pesti në familje dhe para një viti që mora dru më shkonte deri në 600 mijë lekë të vjetër. Unë me 130 mijë lekë pension do t'i merrja? Unë nuk marr dot një ilaç që të mjekoj veten. Për mua 5 mijë lekë të vjetër janë shumë, se unë aq pension marr”,-thotë një banor.

“Nuk kam marrë këtë vit dru se nuk më del hesapi. Tani të marr 2-3 batanije që të mbulohem. Po të na shtojë pensionet Rama do marr dru. Po s'na dha, do rri me batanije. 65 mijë lekë të vjetër shkon një metër dru. Qeveria duhet të vërë kontroll, jo t’i lërë të flenë mbi dafina se populli është gjynah”,-tregon një nga banorët.

Sfida para dimrit me rritjen e çmimit të druve/ Pensionistët:

Ka edhe pensionistë që arrijnë t’i sigurojnë drutë falë ndihmës së fëmijëve që jetojnë jashtë vendit, ndërsa të tjerë shprehen se do të donin që tregu i druve të ishte më i kontrolluar nga shteti, në mënyrë që çmimet të mos abuzohen nga tregtarët privatë.

“Nuk ka qeveri të kontrollojë drutë. Ç’është kjo?! Një kubik 25 mijë të vjetër! Unë i mora për këtë vit, por nuk mora shumë. Më shkuan 250 mijë lekë të vjetër. Më dërgon lekë vajza nga Amerika edhe prandaj i mora”,-shprehet një nga banorët.

“E përballueshme mund të jetë për mua që kam pension të mirë, por të tjerët nuk e përballojnë dot. Detyrohen të marrin një kondicioner dhe e ndezin sa për të ngrohur një dhomë. Unë po bëj 2-3 vite që kam vendosur kaldajë, edhe është më mirë se punon me gaz. Qeveria duhet të bëjë këtë gjë që druri që shitet të jetë i kontrolluar. Që të marrësh një metër dru i thone 60 mijë lekë të vjetër. Nuk ia del dot se drutë janë të shtrenjtë”,-thotë një banor tjetër.

Sfida para dimrit me rritjen e çmimit të druve/ Pensionistët:

Në zonat e ftohta si Korça, drutë mbeten mjeti kryesor i ngrohjes, jo vetëm për të mbajtur shtëpinë ngrohtë, por edhe për gatim. Megjithatë, me të ardhurat që nuk mbulojnë as nevojat bazë, shumë familje presin ndërhyrjen e qeverisë, qoftë me rritje të pensioneve, qoftë me subvencione për ngrohjen gjatë muajve të dimrit.

“Unë ngrohem me dru sepse jo vetëm ngrohesh, por edhe gatuan. Pa dru nuk del dimri në Korçë, pavarësisht se nuk ka bërë dimër të ashpër. Unë që kam edhe një fëmijë të vogël duhet të marr 6-7 metër dru. Mendoj se drutë duhet të menaxhohen nga shteti dhe jo nga privati”,-tha banori i zonës.

Në shtëpitë e pensionistëve, llogaritë e dimrit nuk bëhen më me metra dru, por me ditë të ftohta që duhet kaluar me kursime. Për ta, çdo ndihmë, sado e vogël, mund të bëjë diferencën mes një dimri të ftohtë dhe një dimri më të durueshëm./CNA





Lajmet e fundit nga