web counter
LEXO PA REKLAMA!

SHKARKO APP

App Store
Google Play

E fundit!

x

Rruga pa shpronësim në Gurras-Tushemisht/ Banorët: 120 familje mbeten pa tokë, punimet nisën pa paralajmërim

28 Tetor 2025, 12:17, Sociale CNA


Rruga pa shpronësim në Gurras-Tushemisht/ Banorët: 120 familje mbeten pa tokë, punimet nisën pa paralajmërim.

Një rrugë e re që lidh fshatin Gurras me Tushemishtin, në njësinë administrative të Buçimasit, po kthehet në shqetësim për dhjetëra familje të zonës. Banorët thonë se projekti ka zënë tokat e tyre bujqësore, por për këtë nuk është bërë asnjë njoftim zyrtar apo procedurë shpronësimi.

Sipas tyre, rreth 120 familje janë prekur nga punimet, ndërsa në disa raste rruga ka kaluar drejtpërdrejt në pronat që kanë certifikata të rregullta pronësie. Banorët u shprehën se janë njoftuar për rrugën vetëm pasi punimet kishin nisur, ndërsa mjetet e rënda kanë hyrë në tokat e tyre bujqësore pa paralajmërim. Fatbardha Cake tregon se toka ku kishte planifikuar të mbillte arra është zënë nga traseja e rrugës. Sipas saj, megjithëse kanë kërkuar sqarime në bashki, nuk kanë marrë asnjë përgjigje prej muajsh dhe nuk është bërë asnjë vlerësim për kompensim.

“Po protestojmë për problemin e tokës, më kanë zënë sipërfaqen. Erdhëm me burrin për ta mbjellë arën, kur na thonë që këtu është për rrugë. Eskavatori punonte, na tha kemi urdhër nga bashkia. Shkuam në bashki, na thanë që do na japin letrat për 10-15 ditë. Po bën 6 muaj kjo situatë. Kërkojmë shpronësimin e tokës dhe vlerësimin. Asnjë lajmërim, asgjë nuk na kanë bërë. Rruga e re po bëhet në dynymin tim. Rruga aktualisht është në tokën time. Rruga ka filluar në 20 maj, ne kemi certifikatë të rregullt”,-tha Cake.

Rruga pa shpronësim në Gurras-Tushemisht/ Banorët: 120 familje

Edhe banorë të tjerë shprehen se kanë humbur pjesë të konsiderueshme të tokës, ndërsa nuk janë pajisur me asnjë dokument që të tregojë sa sipërfaqe u është zënë dhe me çfarë vlere do të kompensohen. Ata thonë se punimet po shkojnë drejt përfundimit, ndërsa askush nuk u ka dhënë sqarime ligjore.

“Jam banore e fshatit Zagorçan. Siç u hap rruga, më kanë zënë 500 metër. S’kemi asnjë njoftim nga bashkia, as vlerësim me çmim të arsyeshëm. S’na kanë ardhur fare kartat se sa na kanë zënë sipërfaqe. Te bashkia kemi vajtur dhe jemi interesuar. Po vjen fundi që do mbyllet rruga dhe asnjë vlerësim, as karta, asgjë. Kemi hall se mos nuk na e njohin tokën”,-tregoi një banor.

Një tjetër banor rrëfen se jetesa e tij varet vetëm nga toka bujqësore, e cila tashmë është zënë nga rruga. Ai kërkon ndërhyrjen e institucioneve për të marrë dëmshpërblimin që i takon dhe për të mbrojtur të drejtën e pronësisë.

“Unë kam 1 dynym tokë, vetëm me atë mbahem, me tokën. Isha në Greqi, u ktheva dhe sa e mora vesh që kanë marrë tokën, kanë hedhur çakull. Me çfarë do rroj unë? Jam me një dorë, 20 mijë asistencë marr. Kërkoj të drejtën time, s’na kanë pyetur fare. I kam të gjitha me certifikata. Kërkojmë të drejtat tona, shpronësimin, zgjidhje për të gjithë fshatarët”,-tha një banor.

Banorët i bëjnë thirrje Bashkisë së Pogradecit të ndërhyjë menjëherë, të kryejë evidentimin e sipërfaqeve të zëna dhe vlerësimin për shpronësim, duke paralajmëruar se, në të kundërt, do të vazhdojnë protestat deri në zgjidhjen e problemit./CNA





Lajmet e fundit nga