web counter
LEXO PA REKLAMA!

SHKARKO APP

App Store
Google Play

E fundit!

x

"Korça në ngjyrë rozë”/ Paradë dhe aktivitete sensibilizuese kundër kancerit të gjirit

21 Tetor 2025, 13:02, Sociale CNA

"Korça në ngjyrë rozë”/ Paradë dhe

Në kuadër të muajit tetor, i njohur si muaji i ndërgjegjësimit për kancerin e gjirit, në pedonalen e qytetit të Korçës u zhvillua një aktivitet sensibilizues me pjesëmarrjen e dhjetëra grave, vajzave dhe punonjësve të institucioneve shëndetësore.

Atmosfera e ngrohtë dhe ngjyrat rozë që mbizotëruan në bulevard sollën mesazhin e përbashkët të kujdesit dhe dashurisë për jetën. Pjesë e këtij aktiviteti ishte edhe një paradë simbolike, ku pjesëmarrëset përçuan mesazhin “Duaje jetën, çdo ditë e jotja vlen”, duke u bërë thirrje grave të mos neglizhojnë shëndetin e tyre dhe të kryejnë kontrollet mjekësore në kohë.

Sipas Nada Tërpos, shefe e kujdesit shëndetësor parësor, ndërgjegjësimi i grave në qarkun e Korçës është rritur ndjeshëm vit pas viti. Vetëm gjatë muajit tetor të vitit të kaluar janë realizuar mbi një mijë mamografi, ndërsa edhe këtë vit, ritmi i kontrolleve vijon me 40 deri në 50 ekzaminime në ditë. Qëllimi, theksoi ajo, është që mamografitë të mos kryhen vetëm gjatë muajit tetor, por gjatë gjithë vitit, pasi shërbimi ofrohet çdo ditë në poliklinikën e qytetit.

 

“Ne nga viti në vit shohim një ndërgjegjësim te gratë e rrethit të Korçës. Vjet gjatë muajit tetor janë realizuar 1067 mamografi dhe këtë vit po me të njëjtin ritëm, vazhdojnë mamografitë me 40-50 në ditë. Qëllimi për këtë sensibilizim nuk është që këto mamografi të bëhen vetëm në muajin tetor, por meqë e kemi mamografinë në poliklinikë, të shtrihen edhe në muajt e tjerë”, tha Tërpo.

 

Nga ana tjetër, Entela Sulo, specialiste pranë Njësisë Vendore të Kujdesit Shëndetësor, theksoi se ky aktivitet është pjesë e një sërë nismash që po zhvillohen gjatë këtij muaji për të ndërgjegjësuar gratë mbi rëndësinë e kontrollit periodik dhe parandalimit të kancerit të gjirit.

 

“Njësia Vendore e Kujdesit Shëndetësor, krahas aktiviteteve të shumta që zhvillon gjatë muajit tetor, sot në Ditën Botërore të Kancerit të Gjirit, jemi bërë të gjitha bashkë nën sloganin 'Duaje jetën, çdo ditë e jotja vlen'. Qëllimi i këtij aktiviteti është që të jemi të gjitha njëzëri për të ndërgjegjësuar të gjitha vajzat, gratë, nënat, motrat tona për parandalimin e kësaj problematike”, deklaroi Sulo.  

 

 

Ndërsa mjekja Flutura Jani theksoi se ky moment duhet të shërbejë si nxitje për çdo grua që të kujdeset për veten dhe të mos i kufizojë kontrollet vetëm në muajin tetor, pasi zbulimi i hershëm mund të bëjë diferencën midis trajtimit dhe shërimit.

 

“Pikërisht për këtë arsye jemi mbledhur sot, të nxisim veten tonë dhe të gjitha gratë që të kryejnë kontrollet e duhura shëndetësore në kohë, ashtu siç e rekomandojnë mjekët e familjes. Të mos fokusohemi vetëm në këtë muaj, por kontrollet të shtrihen përgjatë gjithë muajve të tjerë. Ky moment ndërgjegjësimi të na vlejë të mendojmë që përgjatë gjithë vitit ne t'u drejtohemi institucioneve shëndetësore, sepse kanceri i gjirit vërtet është kancer, por sot me mundësitë që ofrohen, është i trajtueshëm dhe i shërueshëm në shumë raste”, u shpreh mjekja.

 

Aktiviteti përfundoi me shpërndarjen e materialeve informuese dhe me mesazhin e përbashkët se kujdesi për shëndetin duhet të jetë pjesë e përditshmërisë së çdo gruaje./CNA





Lajmet e fundit nga