web counter
LEXO PA REKLAMA!

SHKARKO APP

App Store
Google Play

E fundit!

x

Zhupa rendit problematikat e arsimit/ “Të rinjtë po studiojnë jashtë, kuotat të parealizuara”

7 Tetor 2024, 12:27, Politikë CNA
Zhupa rendit problematikat e arsimit/ “Të rinjtë po
Kryetarja e Komisionit të Edukimit, Ina Zhupa

Kryetarja e Komisionit të Edukimit, Ina Zhupa, ka reaguar në nisje të vitit të ri akademik, duke uruar studentët, ndërsa evidenton problematikat që shoqërojnë universitetet.

Ajo thotë se vetëm 60% e kuotave janë realizuar në universitete, teksa ngre shqetësimin se rinia po ikën dhe nuk zgjedh të shkollohet në Shqipëri. Në Universitetin e Tiranës, në programet e mësuesisë, është realizuar vetëm 30% e kuotave, ndërsa në rrethe situata është edhe më kritike, ku ka degë me vetëm 1 student.

Zhupa nënvizon se qeveria nuk ka bërë politika mbështetëse për studentët, edhe pse kanë kosto të larta, mësimdhënia në kushtet më të papërshtatshme, me mungesën e laboratorëve dhe me mungesën e teksteve cilësore.

Qeveria shqiptare ka shpenzuar 3.6 euro për frymë për kërkimin shkencor në vitin 2022. Është e fundit në Europë, evidenton Zhupa. Kjo e fundit nënvizon se i vetmi plan që ka qeveria është monopolizimi i universiteteve dhe kontrolli sipas orekseve politike.

Reagimi i plotë:

Me urimin si kryetare e komisionit të Edukimit, por edhe si pedagoge për një vit të mbarë akademik pedagogëve, studentëve dhe stafeve, nuk mund të mos shpreh indinjatë për planet ogurzeza të qeverisë për shkencën, universitetet, pedagogët dhe studentët.

Projektligji i ri për shkencën është “thembra e Akilit” në këtë nisje të vitit të ri akademik. Institucionet e Arsimit të Lartë sot, de fakto, përbëjnë mbi 90% të sistemit të shkencës dhe ndoshta mbi 90% të të gjitha burimeve njerëzore që punojnë në fushën e kërkimit, zhvillimit teknologjik dhe inovacionit. Kësisoj, ky ligj që përpiqet të anashkalojë sistemin e arsimit të lartë (AL), sidomos institucionet me status ”Universitet”, apo të ulë peshën e tyre në sistemin e shkencës është i gabuar dhe me pasoja për vendin.

Ministrja Manastirliu duket qartësisht që as nuk ia ka idenë arsimit, por as nuk do të mësoj se ka halle të tjera të drejtimit politik të Tiranës dhe të dosjeve të SPAK-ut.

Vetëm 60% e kuotave janë realizuar në universitete, rinia po ikën dhe nuk zgjedh të shkollohet në Shqipëri. Në Universitetin e Tiranës, në programet e mësuesisë, është realizuar vetëm 30% e kuotave, ndërsa në rrethe situata është edhe më kritike, ku ka degë me vetëm 1 student.

Për studentët nuk ka bërë kurrë asnjë politikë mbështetëse kjo qeveri. Vazhduan me kontratë detyruese dhe jo stimuluese, derisa ta shndërrojnë edhe mjekësinë në degë me rënie të regjistrimeve. Ndërkohë studentët tanë përballojnë bashkë me familjet e tyre tarifat më të larta në rajon. Ata përballen me mësimdhënie në kushtet më të papërshtatshme, me mungesën e laboratorëve dhe me mungesën e teksteve cilësore.

Qeveria shqiptare ka shpenzuar 3.6 euro për frymë për kërkimin shkencor në vitin 2022. Është e fundit në Europë. Edhe i vetmi plan që ka është që edhe këto thërrime, t'i monopolizojë dhe t'i kontrollojë sipas orekseve politike. Pedagogët vazhdojnë të keqpaguar edhe shumë larg trajtimit me dinjitet në hierarkinë e pagave.

Si pedagoge, por edhe si kryetare e komisionit të edukimit nuk do resht së kërkuari llogari, së kërkuari buxhete më të larta për arsimin, mbështetje për studentët, fonde për kërkimin shkencor për institucionet e arsimit të lartë dhe arsim cilësor që u përgjigjet nevojave të kohës./ CNA





Lajmet e fundit nga