Vrasja e 14-vjeçarit/ Manastirliu thyen heshtjen, ndërmerr masat

20 Nëntor 2024, 09:26, Politikë CNA

Ministrja e Arsimit, Ogerta Manastirliu, ka reaguar për herë të parë pas ngjarjes së rëndë te shkolla “Fan Noli”, ku u vra me thikë 14-vjeçari me iniciale M.C. nga një bashkëmoshatar i tij pas një konflikti për motive të dobëta.

Manastirliu, në reagimin e saj, thekson se ngjarja e ndodhur dy ditë më parë është një kambanë e fortë, e cila kërkon forcimin e mëtejshëm të bashkëpunimit mes trinomit mësues - prindër – nxënës.

Manastirliu ka zhvilluar një takim me përfaqësues të ministrive, drejtues të institucioneve qendrore dhe vendore, prindër e mësues, organizata të shoqërisë civile dhe partnerë ndërkombëtarë, ku është diskutuar për masat e shtuara, për fuqizimin e mekanizmave të parandalimit të dhunës në shkolla, përmes një Plani Veprimi për parandalimin e çdo forme të dhunës dhe rritjes së sigurisë në shkolla.

“Siguria e fëmijëve është prioriteti ynë absolut dhe fuqizimi i mekanizmave të parandalimit ndaj çdo forme dhune brenda apo jashtë shkolle, mbetet angazhimi ynë i përbashkët.

Ngjarja e rëndë e ndodhur dy ditë më parë, është një këmbanë e fortë, e cila kërkon forcimin e mëtejshëm të bashkëpunimit mes trinomit mësues - prindër - nxënës; një qasje të re në kurrikulën e edukimit qytetar, ligjor, mediatik dhe digjital në gjithë ciklin e arsimit, duke adresuar sfidat e kohës që jetojmë dhe zhvillimin teknologjik dhe social.

Në një takim të posaçëm me përfaqësues të Ministrive, drejtues të institucioneve qendrore dhe vendore, prindër e mësues, organizata të shoqërisë civile dhe partnerë ndërkombëtarë, diskutuam për masat e shtuara për fuqizimin e mekanizmave të parandalimit të dhunës në shkolla, përmes një Plani Veprimi për parandalimin e çdo forme të dhunës dhe rritjes së sigurisë në shkolla, duke filluar nga kurrikula e edukimit, përmirësimi i protokolleve të punonjësve të shërbimit social dhe psikolog si dhe oficerëve të sigurisë në shkolla; tek platformat proaktive të sinjalizimit të rasteve të konflikteve, të çdo forme të dhunës, bullizmit përfshirë atë online dhe shërbimet për trajtimin e fenomeneve në strukturat arsimore dhe komunitet”, shkruan Manastirliu./ CNA