Vjedhja e drejtorëve të Veliajt, Berisha: Paratë e taksapaguesve i shndërruan në hotele
15 Prill 2024, 20:25, PolitikëCNA
Ish-kryeministri Sali Berisha
Ish-kryeministri Sali Berisha u ka bërë thirrje sonte të gjithë të rinjve për t’u ngritur dhe për të përmbysur regjimin e Edi Ramës. Sipas Berishës, e ardhmja e të rinjve në këtë vend është një greminë e frikshme.
“Sot është koha për t’i bërë thirrje çdo qytetari për revolucion, është koha për të përmbysur këtë regjim me të gjithë forcën tonë.
Vetëm me sakrifica arrihet fitorja, rivendoset dinjiteti, rivendoset shpresa dhe e ardhmja e shqiptarëve.
Iu bëj thirrje të rinjve: Ngrihuni! E ardhmja në këtë vend është një greminë e frikshme!”
Lideri demokrat foli sonte edhe për aferën ”5D”, të vjedhjeve që kanë bërë drejtorët e Erion Veliajt në Bashkinë e Tiranës.
"A mund të imagjinohet, janë dhënë 130 milionë euro, dhe djegësi nuk ekziston. A mund të imagjinohet, drejtorët e tij kanë krijuar kompani dhe kanë shndërruar në hotele paratë e taksapaguesve? A mund të imagjinohet që të qëndrojë ky në pushtet dhe të mos japë dorëheqje një minutë e më parë? A mund të imagjinohet kjo situatë? Më thoni ju mua? Çfarë të ardhme meritojmë dhe do kemi ne në qoftë se nuk përdorim fuqinë tonë për t’u treguar vendin këtyre horrave? Ka ardhur koha për veprime! Për veprime gjer në fitore. Ka ardhur koha për zemërim! Për zemërim gjer në fitore. Ka ardhur koha për guxim!", u shpreh Berisha./ CNA
