web counter
LEXO PA REKLAMA!

SHKARKO APP

App Store
Google Play

Vendimi i GJKKO-së për "5D"-në/ Këlliçi: U përjashtuan nga përgjegjësia morale

29 Janar 2026, 14:44, Politikë CNA

Vendimi i GJKKO-së për "5D"-në/ Këlliçi: U

Deputeti i Partisë Demokratike, Belind Këlliçi, ka bërë një deklaratë për mediat në lidhje me skemën "5D".

Referuar vendimit të sotëm të GJKKO-së për ish-zyrtarët e përfirë në "5D", Këlliçi deklaroi se ata u përjashtuan nga përgjegjësia morale.

 

Deklarata e Këlliçit

 

Më 26 prill 2023 bëra publike për herë të parë skemën "5D" të Bashkisë së Tiranës. Ishte si të ngrije kapakun e një arkivoli institucional dhe të kuptoje jo vetëm korrupsionin, por edhe kalbëzimin shtetëror të organizuar.

Një linjë e padëgjuar vjedhjeje, ku drejtorët e bashkisë funksiononin si elemente të një grupi të strukturuar kriminal, me detyra të ndara, me firma të sinkronizuara për një qëllim të vetëm: zhvatjen 100% të parave publike. Para publike të marra me tenderë, me leje ndërtimi dhe me vulë shteti.

29 tenderë, 30 milionë euro, 3 leje ndërtimi, të gjitha të futura në një ‘gojë’ të vetme, të hapur nga firma personale e kryetarit të bashkisë, Erion Veliaj. Menjëherë pas publikimit, depozitova kallëzimin penal në SPAK.

Hetimi i Prokurorisë, nën drejtimin e prokurorit Klodian Braho, faktoi plotësisht denoncimin dhe çoi për gjykim të gjithë zinxhirin drejtues të Bashkisë së Tiranës. Për 44 javë me radhë protestuam përpara bashkisë për një parim themelor e universal: vjedhja e parave publike nuk mund të amnistohet dhe dëmi duhet t’u kthehet qytetarëve.

Sot, Gjykata e Apelit për Krimin e Organizuar dhe Korrupsionin vendosi kapakun. Jo mbi krimin, jo! Por mbi drejtësinë. Mbi shpinën e dërrmuar të qytetarëve. Drejtuesit e bashkisë, përveç njërit, dolën nga salla jo si të penduar, por të larë, posi u rrëzuan edhe dënimet simbolike të shkallës së parë. As burg. As kthim parash. As përgjegjësi.

Një dosje e varrosur me ceremoni nga një drejtësi që sot prodhoi një kukull fajësie, një Alqi Bllako të dytë, që i varën të gjithë peshën e një grabitjeje kolektive. Të gjithë drejtorët e Bashkisë Tiranë, me përjashtim të Mariglen Qatos, u shpëtuan nga përgjegjësia penale.

Si tek inceneratorët, ku janë zhvatur 200 milionë euro dhe fajin e mban një emër i vetëm, ndërsa sistemi u shpall i pafajshëm. Ky vendim nuk mbylli vetëm një çështje, por zyrtarizoi një doktrinë ku krimi firmoset në qetësi me një stilolaps dhe firma për shefin është jelek antiplumb penal.

Nga sot, çdo nëpunës e di se mund të vjedhë, mund të firmosë, mund të zhvasë, sepse mbi të ka një çati të sigurt pandëshkueshmërie. Bindja shpërblehet. Edhe për më naivin, vendimi i sotëm gjyqësor i dha dërrmën drejtësisë së re. Sot u dërgua mesazhi më i rrezikshëm që mund të prodhojë një shtet, kapitullimi karshi krimit të veshur me kostum institucional.

Gjyqtarët hoqën mantelin, morën çelësat e kasafortës, i dorëzuan te dera e pushtetit, dhe sapo u thanë shqiptarëve: “Mos kërkoni më mbrojtje te ne. Këtu ruhet vetëm krimi”. Në mënyrë të veçantë krimi i organizuar dhe grupet e strukturuara kriminale.

 





Lajmet e fundit nga