web counter
LEXO PA REKLAMA!

SHKARKO APP

App Store
Google Play

Ultimatumi për hapësirat publike/ Gazetarja: Pushteti përfiton financiarisht nga mosrespektimi i qytetarëve

5 Korrik 2025, 16:16, Politikë CNA

Ultimatumi për hapësirat publike/ Gazetarja: Pushteti përfiton

Gazetarja Fatjona Mejdini me anë të një postimi në rrjetet sociale ka reaguar për ultimatumin e dhënë sot nga kryeministri Rama për të liruar hapësirat publike.

Mejdini shkruan se në 10 vitet e fundit trotuaret janë zënë nga pronarë të çdo lloji dhe nuk kanë ofruar asnjëherë një rrugë të sigurt për të kaluar këmbësorët.

Më tej, gazetarja shkruan se kjo është një strategji e mirëplanifikuar ku përfitojnë dhe pushtetarët.

Mejdini shprehet se kjo situatë nuk mund të ndryshojë me urdhra dhe ultimatume sezonale apo me tërheqje vëmendje ndaj qytetarit.

“Në këto 10 vitet e fundit, kur padyshim Tirana është transformuar, qytetari nuk është vendosur në qendër të zhvillimeve. Ai ka qenë një element i padukshëm, i papërfillur dhe i përjashtuar.

Trotuaret i janë zënë nga bizneset, ndërtuesit dhe pronarë të çdo lloji, pa i ofruar asnjëherë një shteg të sigurt për të kaluar. Në shumë zona të qytetit, e drejta për të pasur një trotuar thjesht është mohuar.

Mbetjet dhe inertet u janë lënë përpara pallateve, nëpër cepa apo përgjatë rrugëve, dhe janë pastruar vetëm për t’i hapur vend ndonjë ndërtimi të ri.

Janë ndërtuar pallate të larta pa rampa për gratë me fëmijë apo për personat me nevoja të veçanta.

Kabllot elektrike u janë lënë t’u varen mbi kokë, ndërsa depozitat e ujit t’u rëndojnë tarracat.

Hapësirat publike dhe ato të gjelbra mes pallateve janë zhdukur njëra pas tjetrës, duke ia dorëzuar privatit për të ndërtuar ‘kafe’.

Ky lloj zhvillimi nuk është rastësor, por një strategji e mirëplanifikuar, në të cilën ata që janë në pushtet përfitojnë financiarisht përmes mosrespektimit të qytetarëve.

Prandaj kjo situatë nuk mund të ndryshojë me urdhra dhe ultimatume të sforcuara sezonale, me tërheqje vëmendjeje ndaj deputetit që befas harron qytetarin, apo duke vënë në skenë episodin e radhës të serialit “drejtori arrogant dhe i korruptuar””, shkruan Mejdini./ CNA





Lajmet e fundit nga