Tri gjërat që duhen bërë për të arritur suksesin/ Bujar Leskaj, këshilla për primaret

20 Nëntor 2022, 20:38, Politikë CNA

Deputeti Bujar Leskaj

Deputeti Bujar Leskaj ka dhënë tri këshilla për demokratët në mënyrë që primaret të rezultojnë të sukseshme.

Me anë të një statusi në rrjetet sociale, Leskaj thotë se Partia Demokratike duhet të krijojë një Kod të plotë Etike, i cili duhet të respektohet nga të gjithë në mënyrë vertikale, nga kandidatët, krerët e degëve, deri edhe në Kryesinë Qendrore.

Gjithashtu, ai thotë se kandidatët duhet të angazhohen për një mbështetje të plotë, duke shmangur retorikën përçarëse dhe duke kontribuuar për fitoren e saj.

Deputeti kërkon që primaret të zhvillohen me debat konstruktiv, duke ftuar dhe insistuar që të marrin pjesë në këtë proces kaq të rëndësishëm veç anëtarësisë edhe ajo pjesë e anëtarësisë e angazhuar në jetën qytetare.

Statusi i plotë:

Partia Demokratike me Primaret po bën një hap të madh, hapin e vlerave, garës demokratike që partia u ofron anëtarëve të saj, qytetarëve e shoqërisë: të sistemit konkurrues të demokracisë funksionale e të drejtpërdrejtë ku vota e çdo demokrati sot dhe e çdo shqiptari nesër ka vlerë.

Tri gjërat që duhen bërë për të arritur

Por që Primaret të jenë të susksesshme edhe në të ardhmen duhet që:

Së pari, Partia Demokratike nuk duhet të mjaftohet vetëm me katër pikat, të cilat firmosin kandidatët në formularin e kandidimit.

Duhet të krijohet një Kod i plotë Etike në PDSH, i cili duhet të respektohet nga të gjithë në mënyrë vertikale, nga kandidatët, krerët e degëve të PDSH, deri edhe në Kryesinë Qendrore të PDSH, në mënyrë që ky proces kaq pozitivist të mos kompromentohet pa nisur mirë, duke garantuar unitetin, por edhe shpalosjen e vlerave më të mira, të cilat qëndrojnë në ADN-në e Partisë Demokratike, që nga themelimi i saj, sot e në të ardhmen.

Kodi i Etikës sot e në të ardhmen duhet të konsistojë në kryerjen e fushatave pozitiviste, të bazuar në ide, platforma e alternativa, të cilat i shërbejnë komunitetit, Partisë Demokratike dhe bashkimit, i cili do të duhet të sjellë fitoren.

Së dyti, Kodi i Etikës shmang kontestimet e pabaza dhe respektimi i tij bën që, të gjithë kandidatët, si fituesi, ashtu edhe ata të cilët do të votohen, por nuk do të marrin mbështetjen e shumicës së anëtarëve dhe simpatizantëve të PD, të angazhohen për një mbështetje të plotë për PD, duke shmangur retorikën përçarëse dhe duke kontribuuar për fitoren e saj.

a. Të gjithë kandidatët e këtyre primareve, pavarësisht rezultatit nuk duhet të vënë egon personale mbi të mirën e përgjithshme, duke u shkëputur nga PD e thelluar përçarjen, e cila mban peng PD, demokracinë dhe mban në pushtet sektin Rama!

b. Kryetarët dhe sekretarët e PD nëpër degë nuk duhet të abuzojnë me këtë proces, por të jenë të hapur, luajalë me të gjithë kandidatët, të cilëve duhet t’u krijojnë hapësirat e nevojshme që të jenë të barabartë edhe duke e mediatizuar procesin, sikundër duhet respektuar maksimalisht edhe vota e simpatizantëve.

c. Jo vetëm në këto zgjedhje, por në të gjitha zgjedhjet dhe proceset zgjedhore, në të cilat do të kalojë edhe në të ardhmen PD, duhet që kandidatët për deputetë, drejtuesit e lartë të partisë, etj, t’u nënshtrohen primareve.

Së treti: Zhvillimi i primareve duhet të zhvillohet me debat konstruktiv, duke ftuar dhe insistuar që të marrin pjesë në këtë proces kaq të rëndësishëm veç anëtarësisë edhe ajo pjesë e anëtarësisë, e cila nuk kryen jetë partiake, pjesa qytetare e shoqërisë sonë, e angazhuar apo jo në politikë, por e angazhuar në jetën qytetare, Shoqëria Civile, etj./ B.A. - CNA.al