“Tirana duhet të ndërrojë fytyrën”/ Gurra: Këlliçi, një sfidant real i Veliajt

25 Mars 2023, 17:18, Politikë CNA

“Tirana duhet të ndërrojë fytyrën”/ Gurra:

Gazetari Hysni Gurra është shprehur se gara për Tiranën është e fortë dhe nëse qytetarët nuk do të votojnë të intimiduar dhe të kërcënuar nga kryebashkiaku Erion Veliaj, shanset që Belind Këlliçi të fitojë janë të mëdha.

Në një intervistë për mediat, ai tha se Veliaj nuk ka çfarë t’i japë më Tiranës, ndërkohë që kandidati i opozitës, Këlliçi ka ofruar një sërë ndryshimesh si transporti publik dhe uji i pijshëm.

Gurra e ka cilësuar Këlliçin si një kandidat të fortë që ka marrë një risk që nuk e merr kollaj kush në politikën e sotme.

Në fund ai shtoi se ka ardhur koha që Tirana tashmë të ndryshojë fytyrë.

"Tirana ka garë. Belind Këlliçi është një sfidant real i Veliajt. Kemi një kryetar bashkie që kërkon një mandat të tretë që nuk shkitet nga pushteti. Ka qeverisur për dy mandate, bilancet dihen, premtoi se s'do jepte lejte ndërtimi dhe e mbush Tiranën, vjen me premtime që do të ketë ujë të pijshëm dhe nuk ka, se do vijë autobusi në stacion çdo 5 minuta dhe vjen pas 25 minutash, përditshmëria është e prekshme. Vetë fakti që ai ka dëshirë të kandidojë edhe një mandat të tretë, duhet t'i bëjë qytetarët që t'i thonë stop. Ndërsa Këlliçi është një politikan i ri, ka marrë një risk që nuk e merr kollaj kush në politikën e sotme se ruajnë rehatinë. La mandatin dhe erdhi t'i shërbejë bashkisë së Tiranës, ka patur pozicionime të forta politike për moshën e tij dhe historinë poilitke që ka, pra ka fibër politike si kandidat. Unë mendoj se e rrezikon. Ka një garë të fortë, nëse qytetarët do të votojnë të paintimiduar, do të votojnë pa presione, shantazhe, pa u monitoruar nga aktivisti, patronazhisti, mendoj se Këlliçi është kandidat që mund të fitojë Tiranën. Ka qeverisur 8 vjet Tiranën, çfarë do më Veliaj? Po flasim për të ndërruar pak fytyrën e Tiranës, për të ndërruar pak fytyrën e Shqipërisë. Tjetër bëjnë në retorikë. Ky vetë kritikon Berishën, politikën e vjetër dhe rri vetë pas karriges së bashkisë dhe nuk e lëshon.

Tirana është bërë një qytet i pajetueshëm e thonë të gjithë, e thonë edhe socialistët, edhe ata pa parti. Veliaj nuk ka çfarë i jep më këtij qyteti. Përveçse do të jetë e fortë gara, për qytetarët është hera e fundit, po nuk reaguan në 14 maj, këtë vend e ka marrë lumi", tha ai. /CNA.al