“Sot ne qëndrojmë krah për krah”/ Presidenti Begaj, mirënjohje SHBA-së

28 Korrik 2022, 11:48, Politikë CNA

“Sot ne qëndrojmë krah për krah”/ Presidenti Begaj,

Presidenti Bajram Begaj ishte i pranishëm sot në aktivitetin për 100-vjetorin e vendosjes së marrëdhënieve diplomatike, mes Shqipërisë dhe SHBA-së.

Gjatë fjalës së tij, Begaj shprehu mirënjohjen për mbështetjen e vazhdueshme të SHBA-së, ndërsa theksoi se marrëdhëniet miqësore do të vijojnë.

“Kënaqësi e veçantë që sot kremtojmë 100-vjetorin e lidhjeve të marrëdhënieve diplomatike me Shtetet e Bashkuara të Amerikës, partnerin tonë më të madh strategjik.

Një moment i historisë sonë, lidhet me të shkuarën, të tashmen dhe të ardhmen e këtyre marrëdhënieve.

Rol të rëndësishme në krijimin e këtyre marrëdhënieve ka luajtur Presidenti Uillson, i cili ka fituar mirënjohjen e gjithë zemrave shqiptare.

Fan Noli bashkë me Konicën dhe Vatranët e tjerë, besonin fort në politikën amerikane të kohës dhe vunë gjithçka patën në shërbim të miqësisë dhe bashkëpunimit midis dy vendeve.

Presidenti Uillson u bë mbrojtësi më i fuqishëm i pavarësisë dhe moscopëtimit të trojeve të Shqipërisë në Konferencën e Paqes në Paris.

Këto 100 vite konfirmojnë vendosmërinë për ta vazhduar bashkëpunimin, në kohë të vështira e të mira, në momente kyçe të historisë, në sfida të sigurisë e paqes në rajon dhe në botë.

Sot ne qendrojmë krah për krah partnerit tonë strategjik amerikan dhe punojmë së bashku në fusha me rëndësi jetike.

Rezultatet në reformimin, transformimin dhe mirëqeverisjen, si dhe në forcimin e institucioneve të drejtësisë, diplomacisë, sigurisë e mbrojtjes dhe sundimin e ligjit, e kanë shndërruar vendin tonë në një partner i cili përmbush rolin koherent, konstruktiv dhe diplomatik.”-tha Begaj.

Me tej, ai tha se "Falë mbështetjes bujare dhe pa asnjë rezervë të Shteteve të Bashkuara të Amerikës, shqiptarët sot janë një faktor me rëndësi gjeopolitike në Ballkan. Mbështetja e SHBA-së është e paçmuar për çështjen tonë kombëtare. Me të njëjtat principe dhe me të njëjtën vendosmëri me të cilën u mbështet Shqipëria 100 vjet më parë, u mbështet edhe Kosova për shpalljen e pavarësisë."/CNA.al