web counter
LEXO PA REKLAMA!

SHKARKO APP

App Store
Google Play

Sot, afati i fundit/ A do t'i dorëzojë opozita propozimet për zgjedhjen e Presidentit?

29 Maj 2022, 09:28, Politikë CNA
Sot, afati i fundit/ A do t'i dorëzojë opozita propozimet
Godina e Presidencës

Sot është afati i fundit i dorëzimit të kandidaturave nga opozita për Presidentin e ri.

Pas djegies së dy raundeve të para, nesër në orën 10:00 do të mbahet raundi i tretë në Komisionin e Ligjeve për pasuesin e Ilir Metës, të cilit i mbaron mandati në datën 24 korrik.

Edhe në këtë raund do të duhen të paktën 84 vota për të zgjedhur kreun e ri të shtetit.

Deri më tani retorika e mazhorancës ka qenë për një president konsensual të zgjedhur nga palët, i cili nuk do të jetë nga Grupi Parlamentar i Partisë Socialiste.

Megjithatë, deri më sot, gjuha e përbashkët nuk është gjetur. Me Sali Berishën, mazhoranca e ka bërë të qartë se nuk do të ulet në tryezë dhe nuk do të pranojë asnjë kandidat që propozohet nga “Rithemelimi”.

Ndërsa, Enkelejd Alibeaj vijon teatrin me Taulant Ballën për Presidentin e ri, duke gjetur justifikimet se mazhoranca nuk mbajti premtimin.

Nëse edhe nesër nuk do të ketë për diskutim asnjë kandidat, raundi quhet i ezauruar dhe më pas në raundin e katërt dhe të pestë, mazhoranca mund ta zgjedhë edhe e vetme.

Kushtetuta e Shqipërisë parashikon që raundi konsiderohet i bërë edhe nëse nuk paraqitet asnjë kandidat. Pra, opozita nuk e bllokon procesin as me mospjesëmarrjen e saj në seancë, që do ta bënte të pamundur plotësimin e kuorumit në 3 raundet e para, 84 vota.

Ndërsa në dy raundet e fundit, për të zgjedhur Presidentin e ri mjaftojnë 71 vota të deputetëve, vota që PS-ja i ka dhe mund të zgjedhë kë të dojë.

Në Kushtetutë parashikohen edhe rastet ekstreme. Nëse Presidenti nuk zgjidhet as në raundin e pestë, Kuvendi shpërbëhet./CNA.al





Lajmet e fundit nga