web counter
LEXO PA REKLAMA!

SHKARKO APP

App Store
Google Play

E fundit!

x

“Shqipëria një koloni kartelesh, Rama drejtori i operacionit”/ Berisha: Qeveri teknike para se të jetë vonë

2 Korrik 2025, 13:25, Politikë CNA

“Shqipëria një koloni kartelesh, Rama drejtori i

Kryetari i Partisë Demokratike, Sali Berisha, i shoqëruar nga Fatmir Mediu, kryetar i Partisë Republikane dhe anëtar i delegacionit shqiptar pranë Asamblesë Parlamentare të OSBE-së, si dhe Albana Vokshi, zhvilluan një takim të rëndësishëm me Presidenten e Asamblesë Parlamentare të OSBE-së, znj. Pia Kauma, dhe Sekretarin e Përgjithshëm të saj, z. Roberto Montella.

Gjatë takimit Berisha informoi Presidenten Kauma dhe Sekretarin e Përgjithshëm Montella mbi situatën e rëndë dhe në përkeqësim ku ndodhet Shqipëria, si narkoshteti i parë dhe i vetëm në Europë.

Ai vuri në dukje kultivimin masiv të kanabisit në Shqipëri që prej vitit 2015, si dhe miratimin së fundmi, vetëm pak javë para zgjedhjeve, të 138 licencave për prodhimin e kanabisit, kryesisht pranë zonave kufitare.

Grupet kriminale dhe kartelet e mbështetura nga Kryeministri Rama kanë marrë favore në këmbim të mbështetjes së tyre elektorale. Këto grupe janë të përfshira edhe në trafikun e drogërave të forta nga Amerika Latine, dhe disa prej tyre drejtojnë kartele si Sinaloa.

Më tej, Berisha shpjegoi forcimin e karteleve të drogës si rrjeti Troplini/Poja në Qarkun e Durrësit, të cilët kontrollojnë plotësisht portin më të madh të vendit.

“Karteli Çela që kontrollon autostradën e heroinës që vjen nga lindja dhe grupe të tjera kriminale që dominojnë pjesën më të madhe të Shqipërisë, duke mbështetur 28 kandidatë në 10 qarqe dhe 21 bashki gjatë zgjedhjeve të fundit, mbi 20 prej të cilëve do të jenë pjesë e parlamentit të ardhshëm”, tha Berisha.

Lidhur me pastrimin e parave, Berisha paralajmëroi se Shqipëria është shndërruar në lavatriçen më gjigande në Europë për pastrimin e parave të krimit, të dhëna të Eurostat që tregojnë se indeksi i ndërtimit në Shqipëri është trefishuar vitet e fundit, më i larti në Europë, ndërkohë që rritja ekonomike është rreth 3% në vit, ndërsa sektori i industrisë, eksportet dhe bujqësia kanë pësuar rënie të vazhdueshme.

Po ashtu theksoi se hetimet me përgjime nga autoritetet ligjzbatuese të Francës, Belgjikës, Holandës etj., të cilat kanë zbuluar komunikime që përfshijnë zyrtarë të nivelit më të lartë, me përqendrimin më të madh të këtyre bisedave të dyshimta në zyrën e Kryeministrit, i cili ka një koordinator për koordinimin e veprimtarisë së karteleve të drogës dhe grupeve kriminale.

Ai ngriti shqetësimin e thellë që Kryeministri Rama ka shkelur në mënyrë të vazhdueshme Kodin Zgjedhor, përfshirë keqpërdorimin masiv të burimeve publike si:

-faljen e gjobave dy ditë para zgjedhjeve në vlerën 200 milionë euro,

-organizimin e 4,255 aktiviteteve publike në katër muaj duke shpërdoruar detyrën,

-shpërndarjen e një bonusi prej 100 eurosh për rreth 760 mijë pensionistë,

-prokurime të orientuara drejt përfitimeve elektorale,

-aktivitete të profilit të lartë si Giro d’Italia, etj.

Ai nënvizoi rikthimin e një sistemi patronazhist të ngjashëm me strukturat komuniste përmes keqpërdorimit të të dhënave personale, ku çdo nëpunës civil ishte i detyruar të siguronte 10–15 votues të tjerë për të ruajtur vendin e punës, ndërkohë që janë dhënë 138 licenca kanabisi, 147 herë më shumë se sipërfaqja e lejuar nga ligji, që është vetëm 200 hektarë.

Berisha theksoi se në këto zgjedhje, shteti dhe partia në pushtet u shkrinë në një, duke ushtruar intimidim, blerje votash dhe duke kontrolluar mbi 90% të medias. Ai shtoi se janë shkelur të gjitha kriteret e Kopenhagës dhe konventat e tjera demokratike.

Në përfundim, Berisha theksoi se parlamenti i dalë nga zgjedhjet e 11 maj 2025 nuk shpreh vullnetin e popullit shqiptar, ndaj dhe kërkesa e tij është që të ndihmohen shqiptarët të votojnë të lirë dhe deklaroi se vetëm një qeveri teknike, që do të angazhohej për zbatimin e rekomandimeve të ODIHR dhe për përparimin e integrimit europian, mund të garantojë zgjedhje të lira dhe të ndershme në Shqipëri./ CNA





Lajmet e fundit nga