web counter
LEXO PA REKLAMA!

SHKARKO APP

App Store
Google Play

E fundit!

x

Alimehmeti: Kam parë vetë kamerat me shkeljet, por kallëzimin duhet ta bëjë KAS-i

1 Korrik 2025, 10:38, Politikë CNA
Alimehmeti: Kam parë vetë kamerat me shkeljet, por kallëzimin
Ilir Alimehmeti

"Unë kam parë kamerat dhe vota është ndryshe nga numërimi që u është bërë votave për subjektet në numërimin që i është bërë votës për kandidatët".

Ky është perifrazimi i asaj që pretendon Alimehmeti.

Alimehmeti nuk tregon çfarë ka parë nga kamerat që është në fakt kuriozitet legjitim për këdo që e dëgjon.

Çfarë i rezulton nga krahasimi i pamjeve Alimehmetit?

I rezulton që numëruesit i kanë shënjuar fletë votimi që t’ia bëjnë të pavlefshme? Po si e ka kuptuar cila fletë është te njëri numërim dhe që te tjetri e sheh me shenja të shtuara?

Nga pamjet filmike të numërimit të subjekteve politike, ka numëruar votat e Joridës? Dhe ato nuk i dalin aq sa dolën nga numërimi? Dhe dyshon se Joridës grupet e numërimit i kanë shtuar kryqe te fletët që kishin kryqin vetëm për “Madhështorët”?

Nëse është kështu, kjo ka ndodhur masivisht apo vetëm në qendra të caktuara? Pse Alimehmeti nuk e vazhdon tregimin, por e lë atë përgjysmë?

Këto Alimehmeti nuk i sqaron, por në një debat përballë anëtarit të KAS-it, Ledio Braho, vazhdoi që të thotë se ai nuk kishte kërkuar rinumërim, por hapjen e videove.

Nuk është hera e parë që Alimehmeti flet kuturu duke huazuar stilin dhe modelin Basha. Po kaq kuturu fliste edhe në ato pak ditë që ishte kandidat për Bashkinë Tiranë. E mbani mend si thoshte që do ta rriste performancën e bashkisë, sepse do t’i paguante stafin sipas performancës?

Alimehmeti nuk tregon ç'gjëma ka parë në kamera, por sipas tij, KAS duhet të hapë kamerat që t’i shohë dhe të kallëzojë numëruesit? Po nëse KAS i hap kamerat për kuriozitet dhe nuk e sheh atë që paska parë Alimehmeti? Duhet të thotë që Alimehmeti ka mashtruar?

A i ka parë kamerat Alimehmeti? A i ka parë shkeljet? Pse nuk bën kallëzim penal?

Këtë sqarim i dha edhe zoti Ledio Braho kur i shpjegoi se KAS-i nuk bën hetim administrativ veç administron procesin e rinumërimit. Zoti Braho i kujtoi se nëse Alimehmeti kishte prova mund t’i depozitonte në Prokurori. Dhe atje nuk diskutohet legjitimimi ose jo i Alimehmetit.

Se kështu i bie që aty ku nuk legjitimohet si ankues, Alimehmeti çon ankime, atje ku legjitimohet si denoncues, nuk çon denoncime. Mos është pak si rrëmujë e gjitha kjo?

Për sqarim të fundit

KQZ, pas përfundimit dhe nxjerrjes së rezultatit përfundimtar, mund të bëjë edhe hetime administrative. Këto i bën Komisioneri. Edhe atje duhet bërë kërkesë, por atje Alimehmeti legjitimohet si çdo shtetas edhe pa qenë vetë kandidat.

Që Alimehmeti ta dijë për herës tjetër, KAS është KZAZ, thjesht bën rinumërim. Në rinumërim, grupet e rinumërimit janë me staf të KQZ-së. Mbyllin procesverbalet dhe i fusin në kuti.

KQZ, si pjesë e hetimit administrativ, hap edhe filmimet nëse e sheh të nevojshme. Kandidatët, ndërkohë, duhet të presin fundin e rinumërimeve që partia e tyre kërkoi.

Ose edhe të shkojnë në prokurori. Por kjo historia, "unë i kam parë kamerat, por për kallëzim në prokurori duhet të shkosh ti", duket çik si skuthllëk.

Luli ishte si ishte, por këtë nuk e ka bërë./ CNA





Lajmet e fundit nga