web counter
LEXO PA REKLAMA!

SHKARKO APP

App Store
Google Play

E fundit!

x

Rama: "TikTok"-u në vendin tonë stimulon atë që nuk duhet

5 Dhjetor 2024, 14:16, Politikë CNA
Rama: "TikTok"-u në vendin tonë stimulon atë që
Kryeministri Edi Rama

Kryeministri Edi Rama në një takim në Kamzë me mësuesit për kufizimin e "TikTok"-ut është shprehur se ky është një shqetësim me të cilin po përballen shumë vende dhe duhen parë me shumë kujdes masat që duhen marrë, për të kontrolluar fëmijët.

Rama ngriti shqetësimin se "TikTok" në vendin tonë stimulon atë që nuk duhet, ndryshe nga Kina ku tregohet se si zgjidhen ushtrime apo gjëra të tjera argëtuese.

“Në 'TikTok' kanë një shok që u thotë të kundërtën e atyre që u themi ne në shtëpi apo mësuesi në shkollë.

Të gjithë ata që kanë fëmijë në shtëpi e dinë se çfarë lloj lufte është për t’ia marrë nga dora, por nga ana tjetër e dimë që për 1001 arsye që bëhemi pjesë e gabimit kur për të pasur një moment qetësie ua lëmë në dorë.

Ky është një fakt me të cilin përballen të gjitha shoqëritë sot. Në të gjitha shtetet demokratike ka filluar të përshkallëzohet një shqetësim i madh se çfarë po ndodh dhe si mund të frenohet se ajo që ndodh është jashtë kontrollit të shkollës, të familjes, shoqërisë, në raport me prindërit.

Problemi është që 'TikTok'-u në vendet tona bazohet në një algoritëm që stimulon të gjitha ato gjëra që nuk duhen stimuluar. 'TikTok'-u në Kinë është komplet tjetër.

Aty fëmijëve u dalin vetëm gjëra të bukura, si lexohet, si zgjidhen ushtrimet, si dilet me shokët, si këndohet, ndërkohë në botën tonë është komplet tjetër. Prandaj ka lindur një debat i madh që këto rrjete duhen marrë në kontroll të paktën për ata që janë nën moshën 16 vjeç. Janë marrë masa në aspektin ligjor, por nuk ka mekanizma në filtra për të ndarë se kush është fëmija, pasi rrjetet sociale pranojnë anonimitetin dhe asgjë nuk është më në kontroll. Ne po studiojmë të gjitha aspektet dhe jemi në studim. Bllokimi i plotë i 'TikTok'-ut, do të ishte një rrugë qoftë dhe për një periudhë për të parë se çfarë duhet të bëjnë të tjerët dhe faktikisht për ta hequr një shok shumë të keq na duhet për të pasur më shumë kontroll”, tha Rama./ CNA





Lajmet e fundit nga