web counter
LEXO PA REKLAMA!

SHKARKO APP

App Store
Google Play

Rama paralajmëron taksë për prodhuesit e energjisë/ ‘Kanë fitime të shumëfishta’

18 Tetor 2022, 18:03, Politikë CNA
Rama paralajmëron taksë për prodhuesit e energjisë/
Kryeministri Edi Rama

Kryeministri Edi Rama dha lajmin e vendosjes së një takse të jashtëzakonshme ndaj prodhuesve të energjisë, gjatë një takimi me qytetarët në Përmet.

Rama tha se të ardhurat që do të mblidhen nga kjo taksë do të shkojnë si mbështetje për qytetarët.

Ai theksoi se prodhuesit e energjisë nuk janë shumë në Shqipëri, por kanë fitime të shumëfishta që i vijnë nga fati dhe jo nga investimet.

“Në vitin më të lagësht prodhojmë 75% të nevojave, 25% tjetër nuk kemi asnjë rrugë veçse ta blejmë. Kur del në import aty është çmimi katastrofik që të imponohet përndryshe s’ke energji. Me masat që kemi marrë, me investimet që po bëjmë, me projektin e erës që është futur në proces, me Skavicën e kështu me radhë, jemi në rrugën e duhur për të zbatuar atë që kemi thënë. Brenda kësaj dekade Shqipëria duhet të jetë 100% sovrane dhe të shesë energji. Kjo do ketë dy faza. Faza e parë e mbulimit të këtij 25% do jetë brenda vitit 2026 dhe do mbetet vetëm pjesa tjetër për vitet e thata kur akoma do na duhet të importojmë. Por për sa kohë kjo nuk ekziston në faturë, shumë kush mund të thotë “hë mo se nuk është gjë e madhe.”

Por në fakt është, shpenzim shumë i madh. Jemi diskutuar për vendosjen e një takse të jashtëzakonshme për prodhuesit e energjisë. Nuk janë shumë në Shqipëri, por janë disa që e prodhojnë energjinë dhe e shesin në tregun e lirë. Kanë fitime të shumëfishta që vijnë nga fati, jo se kanë bërë ndonjë investim. Do të vendosim një taksë të jashtëzakonshme. Jo për të marrë një shumë të konsiderueshme fondesh në të ardhurat e shtetit, por për t’i përdorur dhe për t’ia kthyer njerëzve në formën e mbështetjes financiare duke filluar me pensionistët dhe ata që janë në nevojë. Duam të jemi solidarë deri në fund, jo me fjalë por me vepra. Gjithë ai volum të ardhurash që do të merret nga ato taksa do të kthehet në mbështetje sociale dhe në mbështetje të rezistencës të gjithë këtij populli ndaj krizës dhe inflacionit të luftës”, theksoi kryeministri./ B.A. – CNA.al





Lajmet e fundit nga