LEXO PA REKLAMA!

SHKARKO APP

E fundit!

x

Rama ndërroi mendje për Samitin e BE-së/ PS vihet në lëvizje  

22 Qershor 2022, 14:17, Politikë CNA
Rama ndërroi mendje për Samitin e BE-së/ PS vihet në
Selia e PS-së

Kryeministri Edi Rama, ditën e sotme bëri të ditur se “ka ndërruar mendje”, në lidhje me Samitin e BE-së, ku dhe do të marrë pjesë. Edhe pse një ditë më parë deklaronte se nuk kishte pse të shkonte sepse përgjigjja për çeljen e negociatave sipas tij do të ishte sërish një “jo”.

Ndërkohë, në prag të Samitit duket se PS-ja është vënë në lëvizje, në një proces lobimi politik për zgjerimin e mbështetjes për dhënien e dritës jeshile në fillimin zyrtar të bisedimeve të anëtarësimit mes Shqipërisë dhe Bashkimit Europian.

Rrjeti "Miqtë e Ballkanit Perëndimor" i përbërë nga partitë dhe fondacionet simotra të Partisë Socialiste të Shqipërisë i është bashkuar thirrjes për një deklaratë të përbashkët drejtuar liderëve të Bashkimit Europian.

"Është koha e duhur që liderët europianë të heqin pengesat që vazhdojnë të pengojnë procesin e anëtarësimit. Është koha që të fillojnë negociatat me Maqedoninë e Veriut dhe Shqipërinë. Është koha që BE-ja të mbështesë konkretisht përpjekjet e Bosnje-Hercegovinës për të kapërcyer ngërçin politik dhe për të vendosur reforma demokratike, në mënyrë që vendit t'i sigurohet statusi i kandidatit sa më shpejt të jetë e mundur. Dhe është koha që Kosovës t'i jepet liberalizimi i vizave, kriteret e të cilit janë përmbushur në vitin 2018", thuhet në deklaratën e bërë publike.

Rrjeti i Miqve të Ballkanit Perëndimor është krijuar falë punës së përbashkët të Fondacionit për Studime Progresive Europiane – FEPS (Bashkimi Europian), Friedrich-Ebert-Stiftung (Gjermani), Karl-Renner-Institut (Austri), Masarykova demokratická Akademie (Çeki), Fondacioni Kalevi Sorsa (Finlandë), Fondacioni Jean-Jaurès (Francë), Fondacioni Max van der Stoel (Holandë), Društvo Progresiva (Slloveni), Qendra Ndërkombëtare Olof Palme (Suedi), në bashkëpunim me CeSPI (Itali).

Thirrjes së Partisë Socialiste i është bashkuar edhe IUSY (Këshilli Botëror i të Rinjve Socialistë) që gjithashtu i është drejtuar me një letër publike drejtuesve të Këshillit të Bashkimit Europian.

"E ardhmja e Europës duhet të përfshijë vendet e Ballkanit Perëndimor dhe zëri i të rinjve duhet të dëgjohet kur krijojnë drejtimin e zhvillimit të Europës, bazuar në pritshmëritë dhe nevojat e tyre. Ne e vlerësojmë gjestin politik të dhënë nga institucionet europiane për të shënuar këtë vit si Viti Europian i Rinisë. Vlerësojmë faktin që Tirana, kryeqyteti i Shqipërisë, është shpallur kryeqyteti europian i Rinisë 2022. Ne kemi treguar se ndajmë vlerat themelore europiane dhe të rinjtë janë të përkushtuar ndaj parimeve dhe vlerave europiane, prandaj meritojnë një të ardhme brenda BE-së. Por ne ju nxisim, secilit prej liderëve të zgjedhur europianë të së tashmes, që të bëni ndryshimin për një të ardhme më të mirë. Është koha e duhur për anëtarësimin e Ballkanit Perëndimor në Bashkimin Europian. Prandaj, ne u bëjmë thirrje udhëheqësve europianë dhe Këshillit Europian që:                       1. Të ndiqni rekomandimet e miratuara me shumicë dërrmuese nga Parlamenti Europian, në raportet 2021/2244 (INI) për Shqipërinë dhe 2021/2248 (INI) për Maqedoninë e Veriut, dhe të nisni negociatat për anëtarësimin në BE me Shqipërinë dhe Maqedoninë e Veriut.                         2. Të promovoni dhe organizoni konferencat e para ndërqeveritare për hapjen e bisedimeve të anëtarësimit me Shqipërinë dhe Maqedoninë e Veriut më së voni deri në fund të vitit", thuhet në deklaratën e IUSY-t./CNA.al

Lajmet e fundit nga