E fundit!

21:22 Aktualitet

Tubimi i 45-të/ Protestuesit marshojnë në rrugët e Tiranës me thirrje kundër qeverisë

Protestuesit janë larguar nga Kryeministria pas përfundimi...

Qeveria fal gjobat dy ditë para zgjedhjeve/ PD i "tërheq veshin" Celibashit: Çfarë ke për të thënë?

9 Maj 2025, 18:09, Politikë CNA

Qeveria fal gjobat dy ditë para zgjedhjeve/ PD i "tërheq

Këshilli i Ministrave ka vendosur ditën e sotme faljen e gjobave të vendosura nga data 1 janar 2015 deri më 30 nëntor 2024.

Pas këtij vendimi ka reaguar Partia Demokratike, sipas së cilës kjo është një shkelje e Kodit Zgjedhore dhe të barazisë në garë.

PD i ka tërhequr veshin kreut të KQZ-së Ilirjan Celibaashit si dhe i ka bërë thirrje SPAK-ut se çfarë ka për të thënë për këtë megashkleje nga ana e kryeministrit Edi Rama dhe qeverisë së tij.

Partia Demokratike në deklaratën e saj për shtyp thekson se Edi Rama është një gjobvënës: që nga 20 përqindëshi i lejeve si kryebashkiak, dhe deri te qindra milionat e inceneratorëve.

Sipas PD me paraqitjen e rrejshme si gjobëfalës në vitin e 12-të të pushtetit, nuk gënjen askënd.

Deklarata e plotë e PD-së

Në shkelje të Kodit Zgjedhor dhe të barazisë në garë, në ditën e fundit të fushatës, Kryeministri në ikje ka firmosur një amnisti të gjerë, duke shkelur arbitrarisht, në mënyrën më anti-europiane të mundshme, ligjin dhe rregullat e garës.

I njëjti që i terrorizoi për 12 vjet me taksa, gjoba dhe përndjekje, tani bën si i mëshirshëm. Nuk ka asnjë pikë dhembshurie në zemrën e tij, por vetëm oreks për të prishur garën, për të ndryshuar vullnetin e zgjedhësve, për të bërë hile, duke përdorur makinerinë e shtetit në ndihmë të partisë.

Ka bërë të njëjtën gjë para dy vjetësh kur, në mes të fushatës, u dha bonus 670 mijë pensionistëve. KQZ në atë rast bëri një interpretim lukashenkian, duke thënë se, në zgjedhje lokale i lejohej, por jo në të përgjithshme. Tani ligji shkelet në zgjedhje të përgjithshme.

Çfarë ka për të thënë z. Celibashi?!

Po SPAK dhe Prokuroria, që kanë ngritur task-forca për manipulimin e zgjedhjeve, çfarë kanë për të thënë për këtë megashkelje?

Partia Demokratike e ka në programin e saj elektoral amnistinë e gjobave dhe të faturave të papaguara, por për shtresat në nevojë, për të pamundurit, jo për abuzuesit.

Premtimi ynë qëndron, por asnjëherë në shkelje të ligjit, dhe në prishje të barazisë në zgjedhje.

Me këtë veprim Edi Rama shpërfill hapur rekomandimet e OSBE-ODIHR dhe rezolutën e PPE, e cila e kushtëzon integrimin e vendit me respektimin e ligjeve dhe rregullave të demokracisë.

Edi Rama është një gjobvënës: që nga 20 përqindëshi i lejeve si kryebashkiak, dhe deri te qindra milionat e incineratorëve. Me paraqitjen e rrejshme si gjobëfalës në vitin e 12-të të pushtetit, nuk gënjen askënd./ CNA