Denoncimi për blerje votash/ Kandidati socialist: Shantazhojnë dhe kërcënojnë shtabet elektorale të PS-së

9 Maj 2025, 10:21, Politikë CNA

Denoncimi për blerje votash/ Kandidati socialist: Shantazhojnë dhe

Kandidati për deputet i PS-së në Qarkun e Korçës, Arian Jaupllari, ka reaguar për vidoen e shpërndarë ku një i ri shprehej se kishte marrë 10 mijë lekë të rinj nga ai në këmbim të votës.

Jaupllari, me anë të një statusi në rrjetet sociale, shkruan se duke pretenduar se po mbrohet vota, po shantazhohen shtabet elektorale të PS-së.

Më tej Jaupllari i bën thirrje KQZ-së, SPAK-ut dhe çdo organi ligjzbatues të zbardhë ngjarjen dhe të vërë përpara përgjegjësisë çdo person që tenton të krijojë konflikte.

Postimi i Arian Jaupllarit

Të nderuar qytetarë të Qarkut Korçë!

Mbrëmjen e djeshme ndodhi një situatë aspak e këndshme, e cila synon të denigrojë fushatën e Partisë Socialiste dhe timen si kandidat i saj, të acarojë klimën politike, në një mënyrë të pakuptimtë, të montuar nga kundërshtarët tanë politikë, duke krijuar situata të përsëritura nga kandidati i Partisë Demokratike, Edmond Spaho, të veshura nën pretendimin e denoncimeve, të cilat montojnë dhe fabrikojnë me regji, fakte të rreme, që ngrihen mbi shfaqje teatrale për të fituar mbështetjen e humbur të “kënetës madhështore”, e cila po bëhet gjithnjë e më e vogël.

Struktura të tilla, të përbëra nga militantë të paarsyeshëm, që nën pretendimin e “mbrojtjes së votës” shantazhojnë dhe kërcënojnë shtabet elektorale të Partisë Socialiste dhe rrezikojnë çdo ditë sigurinë e qytetarëve.

Asnjë lloj video apo foto që shtrembërohet dhe nxirret nga konteksti nuk mund të shërbejë si një alternativë alibie për humbjen e zgjedhjeve nga ana e kundërshtarëve më 11 Maj.

Për të sqaruar situatën, ditën e djeshme kam pasur, në kuadër të fushatës elektorale, një tur në disa fshatra dhe për të mbyllur ditën e angazhimit elektoral u ndala në fshatin Podgorie rreth orës 19:00. Kam kryer takime individuale me banorë të ndryshëm të fshatit, në mbi 20 familje, dhe i kam ftuar të më mbështesin Partinë Socialiste dhe kandidaturën time, ashtu siç kam vepruar në çdo ditë të fushatës. Ndërkohë që isha në përfundim të takimit, rreth orës 20:30, një mjet me targa greke, së bashku me një mjet tjetër tip “Range Rover”, po më përndiqnin mua dhe të rinjtë që më shoqëronin në takim.

Në një moment, drejtuesi i mjetit me targa greke ka qëndruar, duke bërtitur dhe hedhur akuza në drejtim të të rinjve. Për të mos krijuar incident apo konflikt ndërmjet palëve, kemi vazhduar programin sipas axhendës.

Pak momente më vonë jemi informuar që Edmond Spaho ka publikuar 2 video, në të cilat shihet qartësisht që nuk ka asnjë veprim kompromentues, të jashtëligjshëm apo që shkel Kodin Zgjedhor, por nga ana tjetër, ka një mënyrë që insiston që situatën ta përdorin për qëllime elektorale dhe për të krijuar incident në prag të zgjedhjeve.

Në këto kushte, i bëjmë thirrje SPAK-ut, KQZ-së dhe Policisë së Shtetit të zbardhin ngjarjen dhe të vënë përpara përgjegjësisë çdo person i cili tenton të krijojë konflikte, përplasje të pakuptimta dhe kallëzime të rreme.

Garantoj personalisht që çështja është një makinacion politik i krijuar nga ethet e humbjes së Partisë Demokratike, por që do të marrë përgjigjen e duhur më 11 Maj.

Ftoj qytetarët të shkojnë masivisht dhe të sigurt drejt kutive të votimit dhe të mos bien pre e asnjë provokimi apo shantazhi publik.