Protesta e 30-të kundër Veliajt/ Muçollari për CNA TV: Duhej të ishte dorëhequr me kohë

24 Tetor 2024, 16:24, Politikë CNA

Këtë të premte Aleanca për Mbrojtjen e Teatrit dhe opozita do të zhvillojnë protestën e 30-të përpara Bashkisë Tiranë, ku kërkesa kryesore është largimi i kryebashkiakut Erion Veliaj dhe përballja e tij me drejtësinë.

Anëtari i kryesisë së PD-së, Grigels Muçollari, në një prononcim për CNA TV, është shprehur se opozita do të vijojë të denoncojë çdo rast abuziv dhe se ka ardhur koha që të vendoset një ekuilibër i ri në raportin ndërmjet pushtetushtruesit dhe qytetarit.

“Protestat që vazhdojnë prej muajsh kanë zënë një rol të madh duke pasur parasysh qëndrueshmërinë për një kauzë që qyteti i Tiranës apo vetë shoqëria nuk mund ta lejojë të kalojë pa u ndëshkuar, pasi rrezikohen seriozisht vlerat morale, këto aktualet, por edhe ato të brezave të ardhshëm. Denoncimi, por edhe këmbëngulja e opozitës kur ndodh diçka e papranueshme për moralin qytetar, janë një ogur i mirë që tregojnë se opozita është në krye të detyrës së saj, por njëkohësisht, një dëshmi që SPAK-u nuk po ofron atë që të gjithë kërkojmë, drejtësi dhe një ekuilibër të ri në raportin ndërmjet pushtetushtruesit dhe qytetarit”.

I pyetur për efektivitetin e protestave dhe nëse do të vazhdojnë, Muçollari tha:

“Protestat kanë qenë efektive dhe do të vijojnë. Synimi kryesor është ndërgjegjësimi, por edhe mbajtja në vëmendje e abuzimit të rëndë me detyrën nga kryetari i bashkisë dhe për dëmin e madh që u ka bërë qytetarëve të Tiranës. Ky ndërgjegjësim po ndodh. Dhe nuk është pak, në kushtet kur propaganda në fuqi mbulon faktet e korrupsionit që bën vet”.

Muçollari ka komentuar edhe heshtjen e Veliajt, për protestat që zgjasin prej disa muajsh.

“Në lidhje me heshtjen e Veliajt nuk mendoj që është temë diskutimi, pasi nëse do të kishte edhe moralin më të vogël të ndërgjegjes politike, duhej të kishte dhënë dorëheqjen me kohë, edhe në rast se nuk do të ishte fare i përfshirë në këto afera, por thjesht të kishin ndodhur nën hundën e tij, por tashmë dihet përfshirja personale në të gjitha aferat. Vlen të përmendet edhe rasti i pishave që përveç se duhet të kishte një hetim për korrupsion, pasi janë blerë në vlerën e 6800 eurove me prokurim të drejtpërdrejtë, kur vlera e tregut nuk i kalonte 1000 euro, atij duhet t’i hapet çështje tjetër sot (moment që pishat po shkulen në autostradë) për shpërdorim të miliona eurove, pasi siç e fakton Autoriteti i Rrugëve, Veliaj ka qenë në dijeni të projektit të zgjerimit të autostradës”.

Sa i përket formës së protestave dhe a duhet të jenë më të ashpra, Muçollari tha se mbase ka ardhur momenti që njerëzit të lejohen të shprehin revoltën e tyre edhe më shumë.

“Nëse nuk ofrohet drejtësi për këto raste flagrante dhe më shumë prova ndaj Veliajt apo dhe rasteve të tjera të mazhorancës, shoqëria do ta gjejë zgjidhjen nëpërmjet revoltës. Ne nuk presim më që një ditë këtyre t’u lindë morali politik, por ajo që prisnim ishte që drejtësia të vepronte. Në mungesë të saj, mbase duhet të reagojnë njerëzit”. - ka thënë Muçollari për CNA TV. Protestat para Bashkisë Tiranë po zhvillohen për skandalet që kanë ndodhur në këtë institucion, siç janë afera e inceneratorëve dhe dosja "5D"./CNA