"Propozoj një komision të përhershëm njëpartiak"/ Këlliçi: Përfaqësuesit e krimit duhet të kenë hapësirë ku të flasin

16 Shtator 2025, 13:42, Politikë CNA

"Propozoj një komision të përhershëm

Deputeti i Partisë Demokratike, Belind Këlliçi, në fjalën e tij në Kuvend ironizoi dhe akuzoi mazhorancën, duke propozuar një Komision të Përhershëm Parlamentar njëpartiak të përbërë me ligjvënës nga PS-ja që përfaqësojnë krimin e organizuar në parti dhe Parlament.

Këlliçi tha se me strukturën e re parlamentare mazhoranca nuk po kufizon vetëm opozitën, por edhe kolegët e tyre për të diskutuar lidhur me arkitekturën e re të komisioneve.

Deputeti demokrat ironizoi Arbian Maznikun duke thënë se PS po i heq mundësinë Nesti Angonit të drejtojë një komision të përhershëm, duke nënkuptuar se në krye të komisionit hipotetik propozon Maznikun.

"Po kufizoni edhe kolegët dhe anëtarët e partisë suaj për të mbrojtur dhe për të kërkuar më shumë hapësira për vete.

Më bën përshtypje ju shkelni konsensusin e vendosur në këtë sallë për tri dekada kur vjen puna te diskutimi i çështjes së Rregullores së Kuvendit dhe nuk u jepni hapësirën as kolegëve tuaj për të diskutuar për arkitekturën e re të Komisioneve të Përkohshme Parlamentare, por as opozitës për të bërë propozimet e saj.

Unë personalisht e kam të pamundur që të votoj pro ndryshimit të kësaj rregulloreje për sa kohë aty nuk shoh një komision të domosdoshëm të marrëdhënieve me kartelet e drogës dhe me grupet e strukturuara kriminale, i cili do të duhet të jetë në fakt një komision njëpartiak dhe ku ju po u hyni në hak anëtarëve dhe kolegëve tuaj, përfaqësuesve ekselentë të bandave të qarqeve të Elbasanit, Durrësit, Shkodrës dhe Tiranës.

Po i hiqni të drejtën Nesti Angonit që e keni në Grup Parlamentar që të jetë kryetar i një komisioni të përhershëm parlamentar.

Kështu që zoti kryetar i seancës, për ta kaluar këtë çështje në heshtje dhe me forcën e kartonëve ju e dini mjaft mirë që kartonët i keni, por mos mendoni se kjo çështje nuk do të jetë pjesë e debatit publik, informimit të qytetarëve e llogaridhënies para qytetarëve të Republikës së Shqipërisë.

Ajo që ju po bëni sot është thjesht përdorimi i atyre ulëseve që keni marrë përmes bashkëpunimit ekselent që keni si forcë politike me krimin e organizuar dhe me grupet e strukturuara kriminale dhe po tentoni t’i mbyllni gojën opozitës.

Të jeni të bindur që ky debat do të vijojë. Mund të mbeteni vërtet i vetmi kryetar Kuvendi që do të miratojë dhe do të çojë përpara ndryshimin e Rregullores së Kuvendit në mënyrë të njëanshme dhe do të mbaheni mend që keni prishur konsensusin e vendosur që nga parlamenti i parë i postdiktaturës, por ju siguroj që në këtë rast nuk po u ngushtoni hapësirat vetëm deputetëve të opozitës, por po u hyni në hak kolegëve tuaj të mazhorancës.

Nuk mundet bashkëpunëtorët e krimit të mos kenë mundësi të flasin në një komision të përhershëm për këto marrëdhënie.

Po propozoj një komision, ky është komisioni më i rëndësishëm dhe që prevalon mbi çdo komision të Partisë Socialiste.

Nuk mund të lini përfaqësuesit e grupeve kriminale në PS të mos jenë të përfaqësuar në një Komision të Posaçëm të Përhershëm dhe njëpartiak," tha Këlliçi./CNA