"Ke nisur detyrën me shkelje"/ Bardhi-Peleshit: Problemi i Kuvendit nuk është struktura, deputetët janë noterë të qeverisë

16 Shtator 2025, 10:25, Politikë CNA

"Ke nisur detyrën me shkelje"/ Bardhi-Peleshit: Problemi i

Kryetari i Grupit Parlamentar të Partisë Demokratike, Gazment Bardhi, në fjalën e tij në Kuvend, ironizoi kryetarin e ri të Kuvendit, Niko Peleshi, duke thënë se e ka nisur punën me shkelje.

Bardhi hodhi akuza në drejtim të deputetëve të mazhorancës duke thënë se janë bërë noterë të qeverisë.

Kryetari i Grupit të Demokratëve tha se Parlamenti ka votuar edhe ligje klienteliste dhe se struktura nuk është problemi kryesor.

Bardhi tha se seanca është thirrur në kundërshtim me rregulloren dhe u njoftua vetëm 24 orë më parë.

Gjithashtu akuzoi socialistët se po përdorin integrimin për propagandë dite.

"Së pari jam duke folur për procedurë dhe rregullorja thotë që jepet menjëherë, por do të kesh kohë të mësosh.

Keni thirrur sot Seancë Plenare me një rend dite të njoftuar vetëm dje kur rregullorja e përcakton që duhet njoftuar një javë para. Ke nisur mandatin me një shkelje dhe duhet të kërkosh ndjesë. Të kërkoj t’i qëndrosh strikt rregullores dhe të nos bëhesh vartës i njërit apo tjetrit.

Parafolësi tha se nuk mund të ecim me strukturën e vjetër kur shqetësimi më i madh është se ky krah është kthyer në noter të qeverisë. Me votat e PS-së votohen ligje klienteliste me propozim nga oligarkët.

Keni kaluar ligje të shkruara nga kompjuteri i Klodian Zotos dhe këtë e thonë dokumentet e SPAK-ut.

Nuk është shqetësim si do quhen komisionet.

Për sa u përket ndryshimeve në rregulloren e Kuvendit duhet t’u bëjnë me turp. Herën e parë u rrëzuat nga GJK. Duhet të flasim për sulmet e kryeministrit ndaj gjyqtarëve që nuk ndodh në asnjë vend.

Ku ka turp më të madh sesa të përshtasësh strukturën e Kuvendit me atë të Këshillit të Ministrave. Kuvendi nuk është njëpartiak që të diktohen vetëm nga mazhoranca.

Gënjeu kur tha se u kemi lënë përgjegjësi, keni ndarë një komision në tre.

Ku e keni bazuar bashkimin e Komisionit të Jashtëm me atë të Integrimit. Ju referuat Bundestagut, por ka edhe Komision të Jashtëm dhe për Çështjet Europiane edhe Mali i Zi, edhe Maqedonia e Veriut.

Integrimin e keni për propaganda dite. Sa herë vidhni koncesion dhe bëni PPP dilni e thoni se keni hapur grupkapitujt.

Hapja e grupkapitujve është procedurë normale.

Nuk e di nëse e keni hapur rregulloren sepse e nisët me shkelje dhe vazhduat me shkelje, jemi kundër përfshirjes së kësaj çështjeje", tha Bardhi./CNA