web counter
LEXO PA REKLAMA!

SHKARKO APP

App Store
Google Play

E fundit!

x

Nisma për produktet ushqimore pa faturë/ Panariti: Padrejtësi, goditje e rëndë për prodhuesit

19 Korrik 2025, 13:56, Politikë CNA

Nisma për produktet ushqimore pa faturë/ Panariti: Padrejtësi,

Sekretari për Bujqësinë në Partinë e Lirisë, Edmond Panariti, ka reaguar për nismën e qeverisë për të sekuestruar mallrat ushqimore që nuk kanë faturë.

Panariti e quajti këtë një padrejtësi, pasi 90% e prodhuesve shqiptarë janë të pafiskalizuar.

Ky vendim, tha Panariti, i nxjerr tregtarët në mënyrë të dhunshme nga tregu dhe i shkakton një dëm të madh prodhimit bujqësor vendas.

Panariti tha se afati 24-orësh për fiskalizimin e produkteve është një goditje e jashtëzakonshme dhe kërkoi të rishikohet vendimi.

 

Fjalimi i Edmond Panaritit

Deklaratat ultimative të përjashtimit nga tregu po qe se nuk pajisen me faturë tatimore, është 90% e prodhuesve shqiptarë.
Kjo është fizionomia e bujqësisë në Shqipëri, të themi 90% e prodhuesve shqiptarë janë të vegjël dhe të mesëm dhe në pjesën dërrmuese të tyre ata janë të paidentifikuar dhe për rrjedhojë të pafiskalizuar dhe t’u imponosh atyre një afat 24-orësh që o fiskalizohu, o pajisu me faturë tatimore ose dil jashtë tregut, kjo është një padrejtësi.

Në radhë të parë, i nxjerr ata në mënyrë të dhunshme nga tregu, një pjesë e tyre mbajnë familjet, por edhe kontribuojnë në ekonominë familjare pikërisht me atë biznes të vogël dhe të mesëm, të cilët me këtë deklaratë ultimative synon ta nxjerrësh përfundimisht nga tregu.

Ky është një dëm i madh që i bëhet prodhimit bujqësor shqiptar, prandaj dhe arsyeja e rrudhjes së sektorëve të bujqësisë është pikërisht përjashtimi dhe mospërkrahja e biznesit të vogël dhe të mesëm, qoftë me fonde të buxhetit të shtetit.

Janë tashmë të përjashtuar edhe nga fondet e Bashkimit Europian dhe ajo që është më e dhimbshme, është që ngarkohen dhe me taksa e tatime siç është TVSH-ja me 20%, e cila e bën këtë prodhim të pakonkurrueshëm.

Nuk është dëshira e fermerit të vogël apo e atij të mesëm që të harxhojë gjysmën e ditës dhe të dalë buzë rrugës apo në një qoshe të pazarit për të tregtuar prodhimet e tij.

Ai nuk dëshiron ta bëjë këtë, por nuk ka prespektivë prodhimi i tij në qoftë se nuk e merr përsipër të bëjë edhe prodhuesin edhe tregtuesin, sepse nuk ka njeri që t’ia marrë prodhimin, nuk ka një organizatë e cila, sikundër edhe në vendet fqinje dhe ato të Bashkimit Europian, ka rolin për të shkuar fermë më fermë, stallë më stallë, stan më stan për të grumbulluar prodhimin dhe kështu prodhuesi do të prodhojë dhe tregtari bën tregtimin e mallit.

Për rrjedhojë kështu zhvillohet dhe procesi i fiskalizimit, por i imponuar kështu, në mënyrë taksative, me afate 24-orëshe është një dëm dhe një goditje jashtëzakonisht e rëndë për atë prodhuesin e vogël, i cili tashmë, duke filluar që nga dita e nesërme, përndiqet, për arsye sepse ai nuk ka as kasë fiskale, as mundësi ku të autofaturohet.

Prandaj, të rishikohet ky vendim abuziv, është një vendim i pamenduar mirë dhe ajo që është më kryesorja, do ta çojnë bujqësinë shqiptare drejt pikiatave të reja.

Ju e dini që ne kemi 226 mijë krerë lopë nga 490 mijë krerë që lamë në vitin 2017, ky numër do të shkojë drejt tkurrjes së mëtejshme.

Prandaj duhet patjetër të ndalet ky formalizim i sforcuar.

Ne nuk jemi kundër formalizimit, përkundrazi është në interesin e të gjithë prodhuesve, por formalizimi duhet të jetë gjithëpërfshirës, nuk duhet të jetë përjashtues.

Prandaj duhet punuar që ato fonde të Bashkimit Europian, fondet e buxhetit të shtetit të bëhet e mundur që të investohet edhe te prodhuesi i vogël dhe i mesëm për ta mbajtur atë në këmbë, për ta bërë të mundur që të plotësojë dhe ato kriteret dhe standardet e cilësisë së sigurisë dhe për të dalë në treg në mënyrë dinjitoze, krahas prodhuesve të mëdhenj dhe njëkohësisht për të dekurajuar importet asfiksuese, të cilët po e rrudhin bujqësinë përditë e më shumë./ CNA





Lajmet e fundit nga