E fundit!

17:29 Kosova & Bota

Hetimi zbulon dështimet e Britanisë gjatë pandemisë së Covid-19/ U shpërdoruan rreth 10 miliardë paund për pajisje mbrojtëse

Një hetim për menaxhimin e pandemisë Covid-19 në Mbretërin...

“Mos harro Çamërinë”/ Seancë e posaçme për përkujtimin e viktimave, Kim Mehmeti “shkund” Kuvendin

20 Qershor 2022, 11:07, Politikë CNA

“Mos harro Çamërinë”/ Seancë e posaçme

Java çame ka startuar sot me një Parlament të hapur për komunitetin çam dhe për të sjellë rrëfime për gjenocidin mbi shqiptarët e Çamërisë.

Ditën e sotme deputetët e grupit parlamentar “Demokraci dhe Integrim” dhe Kryetari i PDIU-së Shpëtim Idrizi, kanë organizuar një aktivitet në sallën e seancave plenare në Kuvendin e Shqipërisë me temë “Mos harro Çamërinë”.

Java çame do të sjellë disa aktivitete në ditët në vijim, teksa sot për herë të parë Parlamenti i është kushtuar tërësisht kësaj çështjeje.

Gjatë fjalës së tij sot në Kuvend, Idrizi tha se “Është rasti që njerëzit të shohin dhe kujtojnë përmasat, por sigurisht dhe shumë rrëfenja nga dëshmitarë okularë. E nisim javën çame pikërisht këtu sot”.

Ndërsa shkrimtari Kim Mehmeti shigjetoi kryeministrin Rama për nismën e “Ballkanit të Hapur”, ndërsa tha se është e turpshme dhe e pamundur që të pranosh të ulesh me Presidentin e Serbisë dhe të mos i thuash se nuk ndërtoj të ardhme me ty.

“Të gjitha foltoret që ka shqiptaria mund të kuvendojnë për rrugët e së ardhmes, se nga të shkojmë, djathtas, majtas, në mes, drejt Brukselit, drejt Ankarasë, mirëpo ne nuk mund të vëmë në diskutim tragjeditë apo të heshtim, vetëm nga droja se do të mërziten fqinjët tanë apo se do t'i humbim ata, sepse në atë moment që ne do t'i frikësohemi të vërtetave tona, aty ne tregojmë jo vetëm çfarë shqiptarësh jemi, por edhe çfarë njerëzish jemi. Të heshtësh gjenocidin çam, atë të Kosovës, madje dhe atë në Srebrenicë, nuk tregon çfarë shqiptari je, por edhe çfarë njeriu je. Mjafton t’i përkasësh komunitetit njerëzor, për të kuptuar dhimbjen.

I lejohet ndonjë të dehuri të thotë se nuk ka ndodhur asgjë në Kosovë, po si mund të lodhesh duke i numëruar varret e shqiptarëve? Duhet t’i numërojmë deri në fund, sepse tjerët vijnë e i mbledhin eshtrat e ushtarëve të vet, por nga ne i fshehin varret e viktimave tona. Ende Serbia nuk i tregon varret, jo se nuk i di, por bën tregti me viktimat shqiptare, sepse kushtëzon. Është e turpshme të jesh burrë shtetas shqiptar e të mos guxosh të pranosh gjenocidin, të ulesh me presidentin serb e të mos i thuash se nuk ndërtoj të ardhme me ty, kur e di që ai ka dalë nga kapota e Millosheviçit. Ne ende flasim për atë se kush bën gjëra të turpshme e kush jo për shqiptarinë, që është turpi i shqiptarisë.

Jetojmë në kohë të turbullta. Mund të pajtohemi me atë se shumë shqiptarë mund të jetojnë në ballkonet e Ballkanit, por ne duhet të kujdesemi të gjithë për kopshtin tonë të përbashkët, për atë që është shqiptaria. Ky tempull duhet të mbajë përgjegjësi, derisa quhet Shqipëri. Ne mund të përballemi me fatin tonë të keq, që Çamëria nuk mund t’i bashkohet Shqipërisë, por ne nuk mund të pajtohemi me atë që shqiptari nuk mund të kthehet në vendlindje, të kthehet në Çamëri.”-tha Kim Mehmeti./CNA.al