Rama “provokon” Kosovën/ Marrëveshje me qeverinë e Prishtinës siç e kemi me “Ballkanin e Hapur”

19 Qershor 2022, 21:34, Politikë CNA

Rama “provokon” Kosovën/ Marrëveshje me qeverinë e

Kryeministri Rama, në Kosovë

Kryeministri Rama ndodhet për vizitë në Kosovë, ku do të zhvillohet takimi tradicional dypalësh mes qeverisë shqiptare dhe asaj të Kosovës.

Në të tilla takime firmosen marrëveshje të rëndësishme, lehtësimi dhe bashkëpunimi për të dyja vendet, që për hir të së vërtetës duhet thënë se shumë prej tyre kanë mbetur thjeshtë në letra duke mos gjetur zbatimin konkret.

Në vizitën e tij Rama ka theksuar se do të ketë një marrëveshje me qeverinë e Kosovës për përdorimin në mënyrë intensive të portit të Durrësit. Rama ka theksuar në fjalën e tij se marrëveshjet duhet të realizohen siç ka ndodhur me “Ballkanin e Hapur”.

“Ka shumë kompani që përdorin në mënyrë intensive portin e Durrësit. Ne duam të kemi një marrëveshje me qeverinë e Kosovës siç e kemi në 'Ballkanin e Hapur' për të pasur korridoret e gjelbra të operatorëve ekonomikë të autorizuar, të cilët kalojnë pa asnjë ndalesë.

Edhe për këtë na duhet të kemi një marrëveshje. Për këtë duhej të firmosej nesër dhe nuk e di për çfarë arsye u shty nga ana e qeverisë së Kosovës.

Pavarësisht kësaj duhet ta bëjmë një orë e më parë këtë gjë. Kemi sjellë me vete projektin e ri të portit të Durrësit që është konceptuar si port i përbashkët që ose duhet të jetë rajonal me rëndësi të dorës së parë ose ne humbasim një potencial të madh siç e kemi humbur për dekada të tëra”, tha Rama.

Kjo deklaratë vjen në momentin kur Kosova, ka refuzuar Samitin e “Ballkanit të Hapur”, me argumentin se nuk mund të jetë pjesë e një tavoline ku nuk respektohen të drejtat. Sipas Kryeministrit të Kosovës, Serbia duhet të hapet ndaj Kosovës, për të krijuar qetësi dhe stabilitet politik.

Duke ditur qëndrimin e prerë të qeverisë së Kosovës, lidhur me Samitin e “Ballkanit të Hapur”, nuk kuptohet pse e ka përmendur kreu i qeverisë shqiptare këtë samit. Kë do të provokojë dhe çfarë do të tregojë me qëndrimin e tij, mos vallë faktin se nuk do të ketë respektim të marrëveshjeve me Kosovën pa njohur “Ballkanin e Hapur”?!/CNA.al