E fundit!

16:41 Aktualitet

Marshim dhe thirrje kundër qeverisë/ Mbahet sot protesta e 45-të në Tiranë

Ditën e sotme mbahet protesta e 45-të qytetare kundër qeve...

Metës i ikën edhe një deputet

30 Dhjetor 2022, 16:23, Politikë CNA

Që prej janarit të vitit të kaluar qarkulluan zëra se deputeti i Partisë së dikurshme të Lëvizjes Socialiste për Integrim në Shkodër, Agron Çela, do të largohej nga kjo forcë politike për të kaluar në anën e socialistëve.

Çela u tha asokohe se do të largohej duke ndjekur kështu hapat e deputetit Nasip Naço i cili ‘tradhtoi ’ LSI-në e dikurshme për të kaluar në anën e Partisë Socialiste, por ai i mohoi këto zëra duke i cilësuar si lajme të rreme me qëllim shkaktimin e konflikteve.

Ai tha se do të ishte në krye të fushatës së LSI-së dhe madje arriti të merrte mandatin e vetëm të kësaj force politike në këtë qytet dhe një prej 4 mandateve që partia në fjalë fitoi në të gjithë Shqipërinë.

"Albanian Post" mëson se shumë shpejt Çela, një figurë e mbështetur gjerësisht në Shkodër dhe shumë i lidhur me klubin e futbollit Vllaznia, do të shkëputet nga tashmë Partia e Lirisë, si pasojë e kundërshtive të forta që ka me politikëbërjen aty.

Burime pranë kësaj force politike për "Albanian Post" bëjnë me dije se pakënaqësitë e deputetit, janë të lidhura me kohën kur u dogjën mandatet nga Partia Demokratike dhe LSI-ja, në vitin 2019.

Çela ishte kundër këtij vendimi dhe nuk e ka mbështetur atë, pavarësisht se ka respektuar vendimin e partisë.

Prej asaj kohe, u përfol se ai do ta linte LSI-në përfundimisht, për pakënaqësi me mënyrën e organizimit, por një gjë të tillë nuk e ka bërë, duke parë se kreu i vërtetë i të majtëve të qendrës, ka qenë realisht në postin e kreut të shtetit.

Me pritjen e rikthimit të Metës në krye të partisë, Çela ka pritur për ndryshime të mundshme, por siç mëson AP-ja, përtej emrit, asgjë tjetër nuk është ndërruar dhe pakënaqësitë kanë vijuar.

Madje, ai ka munguar për një kohë krejtësisht në mbledhjet e partisë, si shenjë refuzimi për politikat e ndjekura nga LSI-ja dhe si vijim të shprehjes së pakënaqësisë për djegien e mandateve dhe mos-hyrjen në zgjedhjet vendore të vitit 2019.

Me shkëputjen kësisoj nga PL-ja, Çela mbetet si deputet i Kuvendit të Shqipërisë dhe gjasat më të mëdha janë që ai të kalojë për nga radhët e Partisë Socialiste.

Së pari, sepse ideologjikisht, atë nuk e lidh asgjë me Partinë Demokratike dhe së dyti, edhe për një miqësi të hershme me deputeten socialiste, Elisa Spiropali, e cila ushtron edhe detyrën si ministre e Shtetit për Marrëdhëniet me Parlamentin.

Kjo e fundit, është edhe drejtuese politike e qarkut Shkodër për Partinë Socialiste mbi të gjitha.

Teksa, një “flirt” me mazhorancën, Çela e ka pasur edhe në shkurt të këtij viti, kur në Parlament, dha votën pro ndryshimeve kushtetuese për zgjatjen e afatit të organeve të vettingut, edhe pse LSI-ja në bllok votoi abstenim.

Këtë kalim, sipas burimeve të "Albanian Post", është e mundur ta shohim në kohët në vijim, për kalimin përfundimtar, i cili do t’u jepte socialistëve jo vetëm një numër më shumë në Parlament, por edhe një emër shumë të fortë përkrahës në zonën e Shkodrës (zonë historikisht bastion demokrat), ku Çela ka edhe mbështetje të madhe.