E fundit!

11:50 Aktualitet

“Narko i shtetit i Ramës, rrezik i madh”/ Berisha: Duhet të krijojmë grupe të posaçme për kartelet

Kryetari i Partisë Demokratike, Sali Berisha ka mbajtur fj...

Mes sherrit e përplasjeve/ PD e vulës miraton Bashën dhe Hanin si kandidatë për kryetar

22 Qershor 2023, 22:35, Politikë CNA

Mes sherrit e përplasjeve/ PD e vulës miraton Bashën dhe Hanin si

17 anëtarë të Kryesisë së PD-së së vulës kanë miratuar 2 emrat e kandidatëve për garën e kryetarit të ri.

Me anë të një njoftimi për mediat, PD e vulës konfirmon se në garë për zgjedhjet e 29 korrikut janë Lulzim Basha dhe Gjergj Hani.

17 anëtarët e Kryesisë së PD-së së vulës deklarojnë se kritikat dhe bojkoti nga anëtarët e tjerë janë të papranueshme.

Ata i kërkojnë anëtarëve të PD-së së vulës të vetëpërmbahen nga ngritja e pretendimeve, pasi sipas tyre po dëmtojnë interesat e familjes politike të demokratëve.

Njoftimi i plotë:

Në mbështetje të nenit 45, pika 1 të Statutit të PDSh-së, dhe në zbatim të vendimeve të datave 6 qershor dhe 15 Qershor 2023, Kryesia e Partisë Demokratike të Shqipërisë, bazuar në relacionin e paraqitur nga Sekretariati Ekzekutiv, vendosi miratimin e kandidaturave për zgjedhjet për pozicionin e Kryetarit të Partisë Demokratike të Shqipërisë si vijon:

– Gjergj Tomor Hani

– Lulzim Xhelal Basha

Miratimi i kandidaturave për pozicionin e Kryetarit të Partisë Demokratike shënon një moment vendimtar për familjen tonë politike. Në prag të çeljes së garës, ne ftojmë çdo demokrat të jetë pjesë aktive e saj dhe e procesit të riorgnizimit, nëpërmjet të cilit do të ngrihemi në lartësinë e vlerave dhe aspiratave mbi të cilat Partia Demokratike u themelua në Dhjetor të vitit 1990, si forca e parë pro-perëndimore dhe si shpresa e shqiptarëve për ndryshim.

Gjithashtu, nisur nga zhvillimet e fundit brenda forcës sonë politike, Kryesia e Partisë Demokratike e vlerëson të papranueshëm qëndrimin bojkotues të disa prej anëtarëve të saj dhe fton secilin prej tyre të vetëpërmbahet nga ngritja e pretendimeve të pabaza që dëmtojnë interesat e familjes sonë politike.

Ne ftojmë çdo anëtar të Kryesisë së Partisë Demokratike të jetë pjesë e jetës institucionale dhe t’i japë zë çdo shqetësimi që mund të ketë brenda mandatit me të cilin është ngarkuar nga anëtarësia.

Mosnjohja e institucioneve, pretendimet mediatike të pabaza dhe akuzat e pamotivuara nuk ndihmojnë procesin e riorganizimit dhe shfokusojnë përpjekjet e përbashkëta për t’u dhënë demokratëve dhe shqiptarëve një opozitë të fortë dhe një alternativë qeverisëse të denjë për sfidat e Shqipërisë./ CNA.al