"Mazhoranca po përpiqet t'i shmanget debatit"/ Bardhi i përgjigjet Ballës: Kosova e ka miratuar rezolutën për gjenocidin serb

30 Shtator 2025, 12:24, Politikë CNA

"Mazhoranca po përpiqet t'i shmanget debatit"/ Bardhi i

Kreu i Grupit Parlamentar të Partisë Demokratike, Gazment Bardhi, në një konferencë nga Kryesia e Kuvendit, i ka kthyer përgjigje homologut të tij socialist Taulant Balla, i cili u shpreh se opozita ka dërguar mocion jo sipas rregullores dhe se rezolutën e ka kërkuar për të larë biografinë politike.

Bardhi tha se mazhoranca po përpiqet t’i ikë debatit dhe ta kthejë Kuvendin në një institucion pa gojë si grupi i tij parlamentar. Deputeti deklaroi se opozita do të shfrytëzojë çdo hapësirë për të paraqitur kërkesën si për integritetin e kabinetit ashtu edhe për programin qeverisës.

"Alibia e trashë se opozita nuk dëshironte debat dhe vendimi treguan sot se kush janë ata.

Është e paimagjinueshme për çdo Parlament që shumica t’i ikë debatit dhe të mos ketë as program dhe as arritje për të prezantuar në Kuvend. Edi Rama dëshiron ta kthejë Shqipërinë nga Republikë Parlamentare në kryeministrore, do që ta kthejë Parlamentin në Kuvend pa gojë si përfaqësuesit e tij.

Grupi Parlamentar i Partisë Demokratike do të shfrytëzojë çdo hapësirë, si për integritetin e anëtarëve të kabinetit ashtu edhe programin që më shumë ka gafa.

Mocioni është i detyrueshëm, Konferenca e Kryetarëve nuk përcakton datën, kjo bëhet për t’i ikur debatit. Detyra e Kuvendit nuk është për të ngirtur kartonë memecë", tha Bardhi.

Bardhi i ktheu përgjigje Ballës edhe për çështjen e rezolutës ku tha se Kuvendi i Kosovës e ka miratuar rezolutën për gjenocidin serb dhe presidentja Osmani i ka kërkuar Kuvendit të Shqipërisë që të miratojë rezolutën. Bardhi tha se në vitin 2017 kur Kosova miratoi këtë rezolutë opozita nuk ishte në Parlament, por me rikthimin në vitin 2021 ajo paraqiti kërkesën.

"Kuvendi i Kosovës ka miratuar një rezolutë për gjenocidin serb, përfaqësuesit tanë atëherë nuk ishin në Kuvend.

Presidentja e Kosovës, Vjosa Osmani, atëherë deklaroi se Shqipërinë e kanë pasur gjithmonë në krah, se Kosova ende nuk ka ulëse në një pjesë të madhe të organizatave ndërkombëtare. I lutemi Kuvendit të Shqipërisë të miratojë një rezolutë.

Menjëherë sapo grupi ynë u kthye në Kuvend në vitin 2021 paraqitëm rezolutën. Kemi paraqitur 3 të tilla ku Kuvendi duhet të dënojë gjenocidin serb", deklaroi kryetari i Grupit Parlamentar të PD-së.

Bardhi i drejtoi kryeministrit Edi Rama një pyetje publike:

"Pse mazhoranca refuzon t’i bashkohet Kosovës në dënimin e gjenocidit serb? Kjo do të ishte ndihmesë edhe në çështjen e ish-krerëve të UÇK-së.

Ne nuk do të heqim dorë as nga kjo kërkesë, do të qëndrojmë në krah të qytetarëve të Kosovës", u shpreh Bardhi./CNA