Mandati i 4-t/ Rama, për Shëndetësinë: Do të mbështetemi në dy shtylla të rëndësishme

20 Shtator 2025, 11:27, Politikë CNA

Mandati i 4-t/ Rama, për Shëndetësinë: Do të

Kryeministri Rama vijoi sot me prezantimin e ministrave të rinj të kabinetit, të cilët morën zyrtarisht drejtimin e ministrive përkatëse.

Prof. Dr. Evis Sala është ministrja e re e Shëndetësisë dhe Mirëqenies Sociale, të cilën Kryeministri Rama e prezantoi sot në mjediset e Qendrës Spitalore Universitare Nënë Tereza, si një ish-studente të shkëlqyer të Fakultetit të Mjekësisë, e cila prej thuajse 30 vitesh ka krijuar një karrierë nga më mbresëlënëset ndër shqiptarët nëpër Europë apo në botë, duke spikatur si mjeke, si akademike dhe si drejtuese në disa prej universiteteve dhe qendrave më të njohura të botës.

Gjatë fjalës së tij, Rama bëri një analizë të asaj që qeveria ka bërë në mandatet e mëparshme, ndërsa ndau dhe vizionin e asaj që do të bëjë në Shëndetësi në mandatin e katërt.

“Në mandatin tonë të parë, ne mbyllëm gropat e thella të borxheve të trashëguara të sistemit tonë shëndetësor.

Në dy mandatet e tjera bëmë investime të qenësishme për të transformuar infrastrukturën e sistemit tonë shëndetësor, ku praktikisht transformuam shumë spitale, ndërtuam spitale të reja dhe qindra e qindra Qendra Shëndetësore.

Në mandatin e tretë rritëm në mënyrë të konsiderueshme pagat e mjekëve dhe të infermierëve, duke i vendosur në një nivel të përafërt me rajonin.

Ndërkohë që në mandatin e katërt duam të shkojmë më tej dhe të hyjmë më thellë në përmbajtjen e transformimit për sa i përket asaj që duhet që shëndetësia, sistemi ynë shëndetësor, shërbimi ynë shëndetësor t’u ofrojë qytetarëve përtej infrastrukturës së transformuar dhe përtej asaj që u detyrohemi mjekëve dhe infermierëve si shpërblim punës të tyre.

Besoj që disa piketa kyçe janë vendosur. Është shumë e qartë që janë dy shtylla të rëndësishme mbi të cilat ne do të mbështetemi, nga njëra anë krijimi i mëtejshëm dhe zgjerimi i aleancave me ekselencat ndërkombëtare dhe nga ana tjetër futja me përparësi e Inteligjencës Artificiale në sistemin tonë shëndetësor.

Në aspektin e parë kemi hapur tanimë një trase dhe këtu në territoret e QSUT-së kemi firmosur edhe një marrëveshje me një nga ekselencat italiane dhe europiane, qoftë për administrimin e QSUT-së, qoftë edhe për universitetin që duam të krijojmë një sinergji mes universitetit “Vita e Salute” dhe universitetit tonë të mjekësisë.

Kemi nisur një bashkëpunim të drejtpërdrejtë për Spitalin Onkologjik me një ndër spitalet më të mira të botës, numri tetë në botë, 'Sheba' në Izrael. Duam të shkojmë më tutje me hapjen e një universiteti të ri mjekësor në Fier, pranë spitalit 'Memorial'.

Duam të shkojmë më tutje edhe me ndërtimin e një spitali ekselencë që të ofrojë dhe shërbime, si pikë referimi i turizmit shëndetësor dhe që të jetë në gjendje të përballojë kërkesat shumë të larta përgjatë, sidomos sezonit veror, për shërbimin spitalor. Dhe nga ana tjetër, jemi në diskutime për të lidhur një partneritet strategjik me një ndër kompanitë më të mirënjohura në fushën e Inteligjencës Artificiale në shërbim të shëndetësisë, e cila praktikisht është i vetmi 'unicorn' në shëndetësi që deri tani ka Mbretëria e Bashkuar.

Të gjitha këto dhe të tjera, sigurisht që do të jetë në fokusin e ministres së re, së cilës po ia kaloj fjalën për të thënë disa gjëra sot në ditën e prezantimit të saj dhe patjetër, duke i uruar punë të mbarë me kolegët e dikurshëm, në të njëjtat territore dhe me kolegët e rigjetur në po këto territore, pas një xhiroje të botës, dhe duke shpresuar që mirëkuptimi i padiskutueshëm profesional do të sjellë pastaj edhe mirëkuptimin e domosdoshëm në aspektin e administrimit secili dhe secila sipas nivelit të përgjegjësisë dhe pozicionit të vet”, tha Rama./ CNA