Malltezi sqaron akuzat/ “Mendjet malinje e shpallin bamirësinë krim, familja Berisha s’ka përfitime nga unë”

20 Shtator 2024, 15:26, Politikë CNA

Malltezi sqaron akuzat/ “Mendjet malinje e shpallin bamirësinë

Jamarbër Malltezi, drejtuesi i Departamentit të Mjedisit në PD

Jamarbër Malltezi, drejtuesi i Departamentit të Mjedisit në PD, ka sqaruar në një deklaratë për mediat akuzat e ngritura ndaj tij në dosjen e SPAK-ut.

Sa u përket pretendimeve se ka paguar faturat e avokatëve të ish-kryeministrit Sali Berisha, Malltezi tha se këtë gjë e ka bërë vetëm në një rast, por familja e bashkëshortes së tij nuk e kanë pranuar dhe e kanë cilësuar si borxh.

Ai theksoi se në të gjitha rastet tjera shpenzimet ia ka mbuluar Argita Berisha Malltezi.

Nga ana tjetër, për bamirësinë në fondacionin e Liri Berishës, drejtuesi i Departamentit të Mjedisit në PD deklaroi se mendjet malinje e shpallin si krim.

Ai u shpreh se të gjitha paratë kanë shkuar për fëmijët, pagesat e mjekëve dhe të sanitareve, ndërsa familja Berisha s’ka asnjë përfitim nga këto para.

Pjesë nga deklarata:

Prokurorët politikë gënjejnë kur shkruajnë se Jamarbër Malltezi ka paguar faturat e avokatëve të Sali Berishës. Në fakt, të gjitha ia ka përballuar e bija, Argita.

Unë kam paguar veç për gjyqin në Francë dhe me shumë kënaqësi ia mbuloj, por nuk e kanë pranuar, ndaj është shënuar borxh dhe është deklaruar si borxh edhe në ILDKP.

Më pas, janë 2 pagesa të tjera që kam kryer për në Angli me e-banking, por që të dyja janë rimbursuar 100% nga Argita.

Më pas gënjen që pagesat për Fondacionin Fëmijët Shqiptarë, të cilat janë zekat-bamirësi për trajtimin e fëmijëve. Këtë zekat e kryej çdo vit, biles e kam kryer edhe para 2 javësh për një fëmijë tjetër në këtë qendër, por mendjet malinje të shërbëtorëve politikë e konsiderojnë bamirësinë si krim apo vepër penale.

Unë e kryej çdo vit me bankë, pasi kam paguar çdo detyrim tatimor.

Çdo lekë i paguar shkon për trajtimin e fëmijëve, për pagesat e mjekëve, sanitareve, krijimin e kushteve për trajtimin e fëmijëve.

Znj. Berisha punon për humanizëm në mënyrë vullnetare dhe nuk ka asnjë të ardhur, nuk merr pagë, as shpërblim. Pra, vetëm jep për këtë fondacion.

Pra, unë heq para të miat nga banka për të paguar trajtimin e fëmijëve dhe asnjë nga familja Berisha nuk përfiton asnjë lek. Atëherë, pse shërbëtorët politike të Edi Ramës e shënojnë bamirësinë si përfitim direkt të Sali Berishës? Këtë vetëm një mendje malinje e urdhëruar nga shërbimi politik i Edi Ramës mund ta thotë.

Nuk ka asnjë fakt, asnjë dëshmi, asnjë dokument që Jamarbër Malltezi ka pranuar apo ka dhënë ryshfet për asnjë person dhe nuk del në asnjë faqe të këtij dokumenti që e quajnë aktakuzë. Por shërbëtorët politikë të Edi Ramës e shpallin bamirësinë si krim, apo si vepër penale./ CNA