“Lapaj dhe të tjerët janë 'çunat e Saliut'"/ Balla: Bufi nuk mund të blejë besimin e shqiptarëve as me 600 milionë dollarë

1 Maj 2025, 17:55, Politikë CNA

“Lapaj dhe të tjerët janë 'çunat e

Drejtuesi Politik i Partisë Socialiste për Diasporën, Taulant Balla, në një takim elektoral me të rinj e studentë nga Librazhdi në Tiranë, denoncoi pagesën e lobimit prej 6 milionë dollarësh nga PD, që sipas tij nuk mund të blejë besimin e shqiptarëve.

“E dini sa është 6 milionë dollarë? Është shumë. Është më e madhe se buxheti i gjithë Bashkisë Tropojë, përfshirë të gjitha shpenzimet për çerdhet, për kopshtet, për shkollat, për mirëmbajtjen e shkollave, për punonjësit dhe për investimet e Bashkisë Tropojë. Partia Demokratike dhe Sali Berisha paguajnë 6 milionë dollarë, për çfarë? Për të pastruar non gratën. S’pastrohet ajo! Nuk blihet as me 6 milionë, as me 60 milionë, as me 600 milionë, se ç’mendojnë shqiptarët për të”,-deklaroi Balla.

Balla në këtë takim iu drejtua veçanërisht votuesve të rinj, duke i ftuar të votojnë PS, pasi nuk do të pendohen kurrë.

“Partia Socialiste e Shqipërisë, gjatë gjithë rrugëtimit të vet, nuk i ka bërë kurrë dëm Shqipërisë. Dhe kjo është një arsye shumë e rëndësishme që ju ftoj dhe ju. Partia Socialiste lindi në 1991-in, si një forcë politike e së majtës. Dhe prej atij momenti u vu në shërbim të interesit madhor të Shqipërisë, që është anëtarësimi në Bashkimin Europian. Asnjëherë gjatë këtyre 34 viteve nuk e keni parë dhe nuk keni për të dëgjuar ndonjëherë që Partia Socialiste të ketë qenë kundër interesave të vendit”,-tha Balla.

Balla tha se PS mbetet oferta më e mirë edhe krahasuar me forcat e reja që ‘s’janë veçse zgjatime dhe riciklime.

“Nuk është i ri as ai Lapaj. Se kishte dalë atje e kishte mbledhur disa në një cep dhe thoshte: ‘Taulant, shiko sa kam mbledhur këtu.’ Po nuk është kjo çështja. Sepse ti nuk je i ri. Ke kandiduar që në 2013 me Kreshnikun. Dashi, po doli një herë në pazar dhe nuk shitet, mos e nxirr më, se nuk shitet më. Ky Tiku dhe ky Luli, tani Lul Basha është i ri?! Çunat e Saliut janë! Një babë kanë, edhe për model, edhe për mënyrën se si e shohin ata Shqipërinë dhe mënyrën se si ata duan t’i kërkojnë votën shqiptarëve”,-tha Balla.

Në përmbyllje, Balla kërkoi besimin e të rinjve për Partinë Socialiste./CNA