Kërkesa e SPAK-ut për "arrest shtëpie"/ Berisha: Jam 100% dakord, do ta votoj në Kuvend

12 Dhjetor 2023, 13:01, Politikë CNA

Kërkesa e SPAK-ut për "arrest shtëpie"/ Berisha: Jam

Kreu i Partisë Demokratike, Sali Berisha, në një konferencë me gazetarët, ka komentuar shkresën e SPAK-ut, ku i kërkon Kuvendit autorizimin për ndryshimin e masës së sigurisë për të.

Berisha është shprehur se është 100% dakord me procedurën dhe se do të votojë pro në Kuvend.

"Në vitin 2012 Sali Berisha ka dërguar në parlament aprovimin nga Kushtetuta të çdo lloj mbrojtjeje të deputetëve të Kuvendit. Ky ligj i qeverisë është kundërshtuar në mënyrë të prerë nga Edi Rama dhe është lejuar vetëm hetimi i deputetëve. Jam i gatshëm ta votoj vetë këtë ligj edhe sot nuk kam asnjë kundërshtim. Nëse unë nuk kam pranuar udhrin e gjykatës është se ajo është shkelje e Kushtetutës, kam mbrojtur parlamentin dhe jo Sali Berishën. Kam refuzuar të zbatoj një urdhër antikushtetues, por për sa i përket konsistencës sime ndaj propozimit të 2012 ajo qëndron plotësisht. Unë jam që deputetët të mos kenë asnjë lloj dallimi nga qytetarët e tjerë. Kjo është një kërkesë krejtësisht normale dhe jam 100% dakord. Unë kam mbrojtur parlamentin, jo Berishën. Tani parlamenti të vendosë çfarë të dojë", tha kreu i PD-së.

Të martën është zbardhur shkresa që kreu i SPAK-ut, Altin Dumani, i ka dërguar Kuvendit të Shqipërisë për ish-kryeministrin Sali Berisha.

Shkresa është dërguar ditën e sotme dhe është firmosur nga kreu i SPAK-ut, Altin Dumani.

Në shkresën dërguar Kuvendit, shkruhet: “Kërkesë për dhënien e autorizimit nga Kuvendi për arrestimin dhe heqjen e lirisë së deputetit nëpërmjet zëvendësimit të masës së sigurisë”.

"Mbështetur në nenin 73 të Kushtetutës së Republikës së Shqipërisë, nenin 231, 260, 288, 289 të K.Pr.Penale, si dhe në Rregulloren e Kuvendit të Republikës së Shqipërisë, nenet 13 dhe 118, bashkëlidhur ju përcjellim kërkesën për dhënien e autorizimit nga Kuvendi i Republikës së Shqipërisë, për arrestimin/heqjen e lirisë së deputetit Sali BERISHA, nëpërmjet zëvendësimit të masës së sigurimit personal shtrëngues nga ajo e "Detyrimit për t'u paraqitur në policinë gjyqësore”, parashikuar nga neni 234 i K.Pr.Penale dhe "Ndalim i daljes jashtë shtetit" parashikuar nga neni 233 i K.Pr.Penale, në atë të arrestit në burg/ arrest në shtëpi, parashikuar nga nenet 238/237 të K.Pr.Penale, në kuadrin e procedimit penal nr. 287 të vitit 2020, të Prokurorisë së Posaçme Kundër Korrupsionit dhe Krimit të Organizuar Tiranë. Gjithashtu në respektim të nenit 288 pika 2, të K.Pr.Penale, bashkalidhur gjeni relacionin e arsyetuar, të shoqëruar me provat përkatëse”, thuhet në shkresë./CNA