"Integrimi në BE është peng i Ramës"/ Berisha: Kjo qeveri nuk ka interes për të ardhmen e shqiptarëve

13 Maj 2026, 14:09, Politikë CNA

"Integrimi në BE është peng i Ramës"/ Berisha: Kjo

Kryetari i PD-së, Sali Berisha, gjatë fjalës së tij për mediat para nisjes së Grupit Parlamentar, foli lidhur me integrimin europian të Shqipërisë ku tha se ky është projekti më i rëndësishëm për shqiptarët, por sipas tij është marrë peng nga qeveria.

Sipas Berishës, kjo qeveri nuk ka asnjë interes për të ardhmen e shqiptarëve dhe se integrimi është proces i padëshirueshëm, sepse kërkon respektimin e lirive dhe të drejtave themelore, të votës së lirë, dhe funksionimin e ekonomisë së tregut dhe rregullave të tregut.

“Çdo ditë e më shumë bëhet botërisht e qartë se Edi Rama është një gangrenë siç shprehet sot një publicist i mirënjohur për të, Michael Rubin, një gangrenë që duhet hequr sa më parë. Në këtë kuadër, mendoj se opozita në kushte të një narkodiktature, po qëndron fuqishëm si zëri i vërtetë i shqiptarëve që besojnë te vlerat e lirisë, që shpresojnë të kenë një të ardhme që meritojnë dhe kjo e ardhme më e mirë është e ardhmja në BE. Nuk ka projekt më të shkëlqyer për Shqipërinë dhe kombin sesa vendosja e Shqipërisë në këtë komunitet ashtu siç e projektonin rilindësit tanë, zonjë midis vendeve të tjera të Europës.

Por ky proces, siç faktohet çdo ditë e më shumë, është marrë peng nga një organizatë kriminale që drejton Shqipërinë, me kreun e saj të Meduzës, Edi Ramën. Shqiptarët duhet ta dinë se këta nuk kanë absolutisht asnjë interes për të ardhmen e tyre, përveçse për të ardhmen e vet dhe parajsën e tyre dhe të fëmijëve të tyre me paratë e qytetarëve shqiptarë.

Për ta, integrimi europian është një proces krejtësisht i padëshirueshëm sepse ky proces ka disa rregulla, ligje, standarde që përparësojnë interesat e qytetarëve shqiptarë dhe nuk pranon qeveritarët hajdutë, nuk pranon lidhjet me krimin e qeveritarëve. Ky proces kërkon respektimin e lirive dhe të drejtave themelore, të votës së lirë të shqiptarëve, por edhe funksionimin e ekonomisë së tregut dhe rregullave të tregut. Opozita ka zgjedhur në këto kushte të qëndrojë e pamposhtur si zëri i ndërgjegjes së këtij kombi, që kërkojnë me çdo kusht ta izolojnë, ta poshtërojnë dhe ta largojnë nga rruga e integrimit”, tha Berisha. /CNA