E fundit!

09:08 Aktualitet

Krimi që ka ndodhur me protestën

Qytetarët kanë të drejtë të protestojnë, rinia, familja. K...

Fondi për partitë politike ndez debate në Komisionin e Ekonomisë/ Spaho “përplaset” me Gjylametin

11 Prill 2023, 15:42, Politikë CNA

Fondi për partitë politike ndez debate në Komisionin e

Komisioni i Ekonomisë dhe Financave miratoi sot fondin për financimin e partive politike në zgjedhjet vendore të 14 majit.

Fondi kap shifrën e 100 milionë lekëve dhe u propozua nga deputetja e Partisë Socialiste, Blerina Gjylameti. Ndonëse u miratua me shumicën e votave, mbledhja u zhvillua me debate.

Deputeti i PD-së, Edmond Spaho, kërkoi që para se të miratohej fondi të kishte konsultime me partitë politike, por Gjylameti e kundërshtoi dhe i përmendi “përplasjet” mes grupeve të PD-së.

Pjesë nga debati:

Blerina Gjylameti: Për sa kohë në ligj parashikohet cila është dyshemeja e shpenzimeve për partitë politike, ndërkohë edhe në çdo palë zgjedhje ka një fond, i cili është në dispozicion të partive politike, nga 45 milionë lekë që ishte në 65 milionë lekë që duhet të ishte, në 130 që ka qenë në 2021-shin, ku mbulohen shpenzimet më të mëdha që kanë partitë politike, sipas vendeve që kanë në Kuvend. Në këto kushte duhet të jemi ne që të marrim një vendim dhe të bëjmë një propozim, duke qenë që fondi që duhet t’u dedikohet partive politike që t’i ndahet sipas vendeve në KQZ, është 100 milionë lekë për të mbuluar shpenzimet. Të mos jemi në 130 milionë që ishin zgjedhje qendrore, por të jetë 100 milionë lekë, sepse janë dhe zgjedhjet lokale. Shpenzimet ndahen në dy pjesë, buxheti i shtetit sipas karrigeve që kanë në Parlament, plus ato që janë donacionet qoftë në pjesën financiare, që s’mund të jenë më shumë se trefish nga totali që buxheti i shtetit ka sanksionuar. Propozimi im është për 100 milionë lekë.

Eduart Shalsi: Është marrë në konsideratë që zgjedhjet e 2019-ës mund të jenë indikatorë, ne mund të ngrihemi dhe të shkojmë deri te shifra që kërkon KQZ, por dhe që propozon Kuvendi. Jemi dakord me shifrën prej 100 milionë lekësh.

Edmond Spaho: Përpara se të marrim vendime, është e mira të konsultohemi me partitë politike. Janë të partive politike. Nuk mendoj që është e udhës, baza në llogaritjen e fondeve është diçka tjetër. Nuk është në linjën e analizave strikte ekonomike apo dëshirave për të përdorur këto para diku tjetër. Mendoj unë!

Eduart Shalsi: Prej disa javësh kemi pasur disa takime me përfaqësuesit e KQZ-së. Kjo e fundit ka marrëdhëniet me partitë politike. Sigurisht që janë bërë me dije ndërkohë, që formula e shpërndarjes është e përcaktuar në ligj. Pra, s’ka mundësi për t’u interpretuar. Të qarta kriteret dhe %.

Blerina Gjylameti: Unë jam dhe anëtare e Komisionit të Reformës Zgjedhore prej shumë vitesh tashmë. Kërkesat politike kanë qenë edhe që 100% i fushatës të financohet nga Buxheti i Shtetit. Po qe se flasim për kërkesa të partive politike jemi në nivele të tjera. Besoj se shifra 100 milionë lekë është e mjaftueshme për të adresuar kërkesat e partive politike.

Edmond Spaho: Çështjet zgjedhore janë trajtuar me konsensus ndërmjet palëve. Sikurse është vepruar në të shkuarën në ndryshimet në Kodin Zgjedhor, duhet që partitë të bien dakord dhe për financimin nga Buxheti i Shtetit. Ju që po merrni këtë iniciativë s’keni vuajtur ndonjëherë për fonde. Madje keni përdorur edhe burime joligjore. Para krimi, droge dhe kuptoj se jeni të gatshëm t’i hiqni fare këto fonde nga Buxheti i Shtetit dhe t’u thoni partive financohuni me donacione. Ju po thoni, t’i shkurtojmë se janë zgjedhje vendore e t’i përdorim për të mbjellë pemë. E ka thënë kryetari juaj në letrat që u është drejtuar kryetarëve të bashkive. Shikoni letrën dhe…

Anila Denaj: Ju në fjalën tuaj ngatërroni shumë elemente. Sot të fokusohemi vetëm te kjo që kemi këtu. Të gjitha akuzat që keni, janë organet që janë për këtë çështje. Mos i ngatërroni këtu… Nuk është ky vendi, gjeni metodën dhe mënyrën për t’i adresuar. Mos ktheni këtu ditën e bilbilave. Bilbilfryrësin bëjeni diku tjetër. Dyshimet që keni denoncojini.

Blerina Gjylameti: Po flasim për rritje të fondit, jo ulje. Nga 65 milionë lekë të parashikuar, shkojmë në 100 milionë lekë. Ndarja është formulë e sanksionuar me ligj për këtë fond. 65 milionë lekë është minimumi që kërkon ligji, ne po themi 100 milionë lekë. Akuza e kundërakuza e probleme të brendshme të opozitës janë në vend tjetër. Ju shoh sot më keq se më parë, do doja të ishit të bashkuar, por është çështje juaja jo jona. Besoj që te ky moment që jemi të shkojmë në votim, s’ka elemente të tjera që kemi hapësirë.

Edmond Spaho: E ke qarë?

Blerina Gjylameti: Unë jo vetëm e qaj, por them gjënë e duhur që ju shqetëson. Hallin tuaj nuk e zgjidh dot. Çështjen se si do t'i ndani paratë mes jush nuk e zgjidh dot.

Arbi Agalliu: Nuk i shkon këtij komisioni ta kalojë diskursin në çështje politike. Zonja Gjylameti s’keni pse përmendni asnjë situatë tonën. Ne kemi shumë më shumë se ju për të përmendur. E mbajmë diskutimin në çështje të rendit të ditës. Këto thumbat apo ironitë thojini sa të doni, por do t'ju përgjigjemi me të njëjtën monedhë./ CNA.al