"Fletëthirrja po përdoret për propagandë"/ Berisha: 21 janari është hetuar nga një armike e egër e PD-së

13 Nëntor 2025, 13:13, Politikë CNA

"Fletëthirrja po përdoret për propagandë"/

Kryetari i Partisë Demokratike, Sali Berisha, në një konferencë për mediat është pyetur në lidhje me fletëthirrjen e SPAK-ut për dosjen e “21 janarit”.

Berisha tha se ai i është përgjigjur gjithmonë çdo thirrjeje, por fillimisht duhet të shkojë një e tillë. Në lidhje me këtë fletëthirrje, Berisha u shpreh se po përdoret për propagandë nga ata që ai i cilësoi si shërbëtorë të bandës që vjedh shqiptarët.

Në lidhje me çështjen e “21 janarit”, Berisha tha se kjo ngjarje është hetuar më parë nga një armike e egër e tij dhe e PD, referuar ish-Kryeprokurores Ina Rama.

Më tej, Berisha u shpreh se pengimi i hetimit të “21 janarit” është bërë nga Edi Rama dhe po përdoret prej 13 vitesh për propagandë. Kryedemokrati tha se Rama i përdori njerëzit si mish për top në atë që ai e cilësoi si protestën më të dhunshme.

“I jam përgjigjur gjithë jetën time çdo thirrjeje. Normal që do t'i përgjigjem, por ka vetëm një kusht që unë të marr thirrje. Ata që e përdorin për poropagandë ata tregojnë se janë shërbëtorë mjeranë të një bande që vjedh ditë e natë qytetarët shqiptarë. Unë i jam përgjigjur çdo fletëthirrjeje. Çështja e 21 janarit është hetuar nga një armike e egër e Berishës dhe e PD-së, një njeri për të cilin unë kam shprehur publikisht të gjitha konsideratat. Është penguar të rihetohet vetëm e vetëm për shkak të Edi Ramës.

Prej 13 vitesh kjo çështje përdoret për propagandë.

Shoferi që përdori njerëzit si mish për top ishte Edi Rama. Protesta më e dhunshme në historinë e njerëzimit. Shërbëtorë të shpifur që e përdorin për të mbuluar krimet e tyre. Në banesën time vijnë qindra letra”, tha Berisha./CNA