Denoncimi i CNA-së/ Këlliçi, thirrje Dritan Prençit: Heto dyshen e pandashme si mishi me thoin

1 Gusht 2025, 13:01, Politikë CNA

Denoncimi i CNA-së/ Këlliçi, thirrje Dritan Prençit:

Deputeti i zgjedhur i PD-së, Belind Këlliçi, në një deklaratë për mediat pas denoncimit të CNA-së për "tentakulat" e Ajola Xoxës deri te landfilli i Sharrës, i ka bërë thirrje prokurorit që fle mbi dosjen e inceneratorit të Tiranës, Dritan Prençi, që të hetojë dyshen e pandashme si mishi me thoin, Erion Veliajn dhe Edi Ramën.

“Tentakulat” e Ajola Xoxës deri te landfilli i Sharrës
1 Gusht, 11:19

“Janë bërë tashmë plot dy vite, që në mënyrë të pandërprerë ju kemi informuar nga kjo foltore për të gjithë dokumentacionin e dorëzuar pranë SPAK në lidhje me hetimin e aferës së shekullit, atë të inceneratorit fantazmë të Tiranës.

Për dy vite me radhë kemi depozituar pranë SPAK-ut dokumente, e-maile, komunikime në aplikacione të ndryshme, të cilat përbëjnë prova të pakundërshtueshme që kjo aferë nuk është kryer nga disa individë anonimë, presta-nome të ndryshëm apo drejtorë të Bashkisë Tiranë të dalë në pension, por është afera personale e dy individëve, të evidentuar edhe nga ish-zv.Kryeministri Arben Ahmetaj si pronarët faktikë, të cilët janë Edi Rama dhe Erion Veliaj.

Sot, në median CNA.al janë publikuar të dhëna nga dosja hetimore e shtetasit Erion Veliaj. Citojmë ekzaktësisht: “Për rastin e shoqërisë 'MEG Albania', Erald Ismaili shpjegon se kjo kompani i ishte referuar nga Ajola dhe Klotilda, klienti Vladimir Fezga kishte ardhur në zyrën e Ajolës për të hapur biznes në landfillin e Sharrës dhe për të marë lejen mjedisore… pas marrjes së lejes, ai mbante mend se aktiviteti i shoqërisë 'MEG Albania' kishte filluar, por nuk kishte informacion se sa kishte vazhduar.

Shtetasi Erald Ismaili deklaroi se megjithëse ishte pronar formal i kompanisë 'Eris Consulting', pronare e vërtetë e saj ishte Ajola Xoxa…”

Të nderuar qytetarë,

Kompania 'MEG Albania' është ajo e cila mori në administrim landfillin e Sharrës, menjëherë pas vdekjes tragjike të minorenit Ardit Gjoklaj. Më pas kjo kompani themeloi edhe kompaninë tjetër 'Eco Recycling' së bashku me kompaninë 'Eco Tirana', e themeluar nga Bashkia Tiranë dhe famozja Amia Verona, e hetuar në Itali për lidhje me Ndranghetta-n.

Në fund të këtyre transaksioneve hyri në lojë edhe kompania e inceneratorit të Tiranës, me bekimin e plotë të kryetarit të Bashkisë Tiranë, Erion Veliaj.

Pyetja që i drejtoj për të disatën herë Prokurorit të kësaj dosjeje, Dritan Prençi, është: Përse nuk hetohet roli i dy pronarëve faktikë të inceneratorit të Tiranës, përkatësisht Edi Ramës dhe Erion Veliajt, në këtë aferë korruptive?

Nëse prokurori Dritan Prençi nuk është ‘qartësuar’ deri tani nga provat e depozituara në SPAK nga ana ime, atëherë sot ka detyrimin ligjor të administrojë provat e reja dhe dëshminë e shtetasit Erald Ismaili, i cili e specifikon qartë se kompaninë 'MEG Albania' e ka sjellë në zyrë Ajola Xoxa dhe kryetarja e Komisionit të Ligjeve, deputetja e PS-së, Klotilda Ferhati Bushka, për të mbyllur pazarin për administrimin e landfillit të Sharrës.

Nga kjo seli dhe nga kjo foltore janë dhënë me qindra deklarata e janë bërë publike shumë fakte që tregojnë se vdekja e minorenit Ardit Gjoklaj në landfillin e Sharrës, jo vetëm që nuk u zbardh kurrë nga organet e drejtësisë, por kjo ngjarje u përdor nga Erion Veliaj si alibi për pikënisjen e aferës korruptive në landfillin e Sharrës, fillimisht me shoqërinë 'MEG Albania' dhe në fund me kompaninë fantazmë të inceneratorit të Tiranës.

Sado që regjimi vijon ta mbajë të mbyllur këtë aferë korruptive që u ka kushtuar deri më tani të paktën 190 milionë euro qytetarëve të Tiranës, e vërteta në fund do të zbardhet.

Pronarët faktikë të inceneratorit Tiranë, Rama - Veliaj, dyshja e pandashme si mishi me thoin, siç dikur shprehej vetë me gojën e tij Erion Veliaj, do të mbajnë përgjegjësi para ligjit, por mbi të gjitha para qytetarëve shqiptarë, të cilët i vodhën dhe i dëbuan si asnjë pushtues në historinë e këtij vendi”, tha Këlliçi./ CNA