web counter
LEXO PA REKLAMA!

SHKARKO APP

App Store
Google Play

Lajthitja/ Të lirohen Veliaj dhe çunat e Dubait

31 Korrik 2025, 12:37, Politikë REDAKSIONALE
Lajthitja/ Të lirohen Veliaj dhe çunat e Dubait
Foto ilustruese

Në një reagim të gjatë, kryebashkiaku i Tiranës, Erion Veliaj, i cili ndodhet në masën e sigurisë burg pa afat në burgun e Durrësit, tashmë me 13 akuza të rënda penale, ka bërë një reagim të gjatë dje në rrjete sociale.

Përtej gjithçkaje që ai thotë, CNA po analizon me detaje qëndrimin e tij.

Së pari, na solli një publikim ku mund ta lexoni këtu, ai theksonte se i ishte bërë një veting 21-vjecar.

E njëjta gjuhë që ka përdorur ilir Meta, Sali Berisha apo Arben Ahmetaj.

Në fakt, Erion Veliaj nuk ka një veting 21-vjeçar, se çfarë do të thotë të bësh një veting mund ta lexoni këtu.

Në fakt, as Ols Dado dhe as Altin Dumani nuk kanë bërë një veting dhe këtu ka shumë pikëpyetje.

-Është një tolerim që i është bërë Erion Veliajt?

-Cila është arsyeja që nuk i bëhet vetingu?

-Pse nuk hetohet si grup i strukturuar kriminal, siç shkruhet në vendimin e tij, gjyqtari i Apelit të GJKKO-së, Engert Pëllumbi?

Por do të analizojmë një tjetër fakt në këtë shkrim. As gabimet e SPAK-ut, as fajet e Erionit, as përgjegjësitë e askujt.

Nga qelitë e burgut të Durrësit Veliaj shkruan se atij i është çuar akuza dhe nuk ka arsye që ai të mbahet në burg.

"Nëse hetimi ka përfunduar, përse vazhdoj të mbahem në paraburgim - larg familjes sime dhe qytetit, të cilit i shërbej? A do të kishte kuptim që unë - Kryetari aktual i Bashkisë së Tiranës - të arratisesha, kur kam lidhje kaq të ngushta familjare, politike dhe shoqërore në Tiranë dhe jam kthyer disa herë në Shqipëri nga jashtë vendit, duke e ditur se kam qenë objekt i këtij hetimi penal? A ka vërtet kuptim që, si Kryetar Bashkie në mandatin e tretë, të kryeja vepra të rënda penale, duke qenë në liri me kusht dhe duke e ditur se jam nën një vëzhgim dhe kontroll të paprecedentë? ", shkruan Veliaj.

Pra, logjika e Erion Veliajt është e thjeshtë. Me vendim të gjykatës mund të arrestohesh, hetohesh, në momentin që të jepet akuza ti duhet të dalësh dhe të ikësh në zyrë. Të shkosh dhe të vazhdosh punën si kryetar bashkie.

Pra, të shkojë në të njëjtin vend ku firmoste urdhërpagesat për Ajolën.

Erion Veliaj ka hallin e karriges, e ka marrë malli për karrigen. Është fiks si rasti te “Kolltukofagët” e Imzot Fan Nolit.

Më poshtë po sjellim edhe një pjesë nga “Kolltukofagët” që të kuptojnë njerëzit se me çfarë kemi të bëjmë.

“’Kulltokofagët’ janë krimba të verdhë me kokë të zezë, që rriten me plagët e infektuara të Shqipërisë në lëngim, këpushë, që mund t’i copëtosh, por jo t’i çqitësh nga trupi që kafshojnë e thëthijnë.

Herodoti na tregon se në betejën navale të Salaminës, një Athenian kapi një anije persiane me dorën e djathtë e s’e lëshonte gjer sa ia prenë; ahere e kapi me dorën e mëngjër; ia prenë dhe këtë; ahere e kapi me dhëmbë dhe s’e lëshoj gjer sa ia prenë kokën.

Sikur të ngjallej Herodoti përsëri do të shikonte që Kolltukofagët t’anë janë më të fortë se ky trim legjendar i vjetërisë greke. Që t’i çqitësh këta t’anët nga kulltuku duhet t’u preç jo vetëm duart e kokën po dhe këmbët e trupin”, thotë Imzot Noli.

Përtej kësaj, përtej çdo paragjykimi, Erion Veliaj thekson se tani që akuza ka shkuar ai nuk duhet të mbahet në burg.

A mund të ishte kaq i paditur dhe i palogjikshëm ky zyrtar i lartë, kryetar i Bashkisë së Tiranës, se me logjikën që thotë Erion Veliaj edhe çunat e Dubait dhe grupet që ndodhen brenda “Sky chat”, “Encrochat” e kanë marrë akuzën?

I kanë arrestuar, akuza u ka dalë, tani sipas logjikës së Veliajt duhet t’i marrin dhe t’i nxjerrin ata pa dhënë vendim gjykata, pa dhënë dënim gjykata, e cila mund të thotë edhe je i pafajshëm.

Se kjo është logjika që përdor kryebashkiaku i Tiranës, Erion Veliaj, i cili shkruan mesazhe të gjata për karrigen e tij nga burgu i Durrësit.

Pra, erdhi akuza, “më lironi mua”.

Kur ishte në burg thoshte më mbani pa akuzë, tani thotë erdhi akuza më nxirrni jashtë.

T’i lirojmë çunat e Dubait, ta lirojmë dhe Erionin, ç’na duhen prokuroria, gjykata, burgjet, drejtësia. E lehtë kjo punë. I arreston, bëhet gati akuza, ik në shtëpi se ke kryer punë.

Të jetë kaq infantil vallë?

Sepse i gjithë diskutimi dhe qëndrimet e mbajtura bashkë publikisht i gjen vetëm te formati i Erion Veliajt në këtë lloj trajtimi apo në shkrimet e Mero Bazes, askund tjetër.

Sepse dhe juristi më i paaftë kur e pyet dhe i thua dikush është arrestuar me 13 akuza dhe tani janë çuar në gjykatë përgjigjja është mjaft e thjeshtë, duhet pritur vendimi i gjykatës ose mund të kërkojë një masë zëvendësimi në rast se kanë ndryshuar disa rrethana, por nuk të arreston dhe liron prokurori se hetoi, ngriti akuzë, dhe çoi në gjykatë dhe pastaj duhet të nxjerrin dhe të ikësh në shtëpi.

Ky është Erion Veliaj. Mjafton të lexoni postimet që bën. Ne do t'ia zbërthejmë ditë pas dite që të kuptoni cili ka qenë ai i vërtetë përtej fasdadës dhe propagandës në media./ CNA





Lajmet e fundit nga