Debate të ashpra, Bardhi kërkon dorëheqjen e ministres së Brendshme/ Noka-Lamallarit: Idiot

9 Tetor 2025, 10:56, Politikë CNA

Debate të ashpra, Bardhi kërkon dorëheqjen e ministres së

Kuvendi është përfshirë nga një debat i ashpër mes kreut të Grupit Parlamentar të Partisë Demokratike, Gazment Bardhi, dhe ministrit të Drejtësisë, Besfort Lamallari.

Bardhi kërkoi dorëheqjen e ministres së Brendshme Albana Koçiu dhe reagim nga kryeministri Edi Rama për deklaratën e KLGJ-së se Policia e Shtetit kishte refuzuar të merrte përsipër sigurinë e godinave. Bardhi kërkoi të mbahet përgjegjësi për këtë ngjarje.

"Në emër të Grupit Parlamentar të PD-së u shpreh ngushëllimet më të sinqerta familjes dhe kolegëve.

Këtë seancë duhet ta kishim nisur me fjalën e dorëheqjes së ministres së Brendshme Albana Koçiu. Është e paimagjinueshme një gjyqtar të vritet në sallën e gjyqit teksa lexon vendimin e dhënë sipas bindjes së tij të brendshme dhe ministrja të gënjejë opinionin publik se Policia e Shtetit nuk ka përgjegjësi për të garantuar sigurinë në institucionet e drejtësisë.

Sipas legjislacionit në fuqi është detyrë e policisë së shtetit të garantojë sigurinë në institucionet e drejtësisë. KLGJ ju nxori zbuluar, korrespondenca ju nxori zbuluar pasi Policia e Shtetit refuzonte kërkesën e KLGJ-së ku kërkonte ndihmën e policisë së shtetit për shkak të ngjarjeve që kishin ndodhur në Apel.

Në derën e gjykatës dhe përgjegjës për hyrje-daljet është policia, jo një roje i paarmatosur.

Ministrja duhet të japë dorëheqjen, kryeministri të japë përgjigje pse nuk u është përgjigjur për 3 vite institucioneve të drejtësisë. Në Apel janë marrë peng 3 gjyqtarë. Ju keni policë për të nxjerrë qytetarët jashtë, por jo për të siguruar institucionet.

Kjo nuk mbyllet me një ngushëllim duhet të kërkojmë përgjegjësi", tha Bardhi.

Pas fjalës së Bardhit reagoi ministri Lamallari, i cili u tregua i ashpër dhe akuzoi opozitën se ka nxitur vrasjen me gjuhën ndaj drejtësisë.

"Të bësh politkë me vrasjen është e rëndë. Keni përgjegjësi për gjuhën e urrejtjes. Në sy të ndërkombëtarëve keni anatemuar ambasadorin vetëm pse ka mbështetur reformën në drejtësi. Nuk keni turp, shqiptarët e dinë, ndaj ju kanë lënë aty ku jeni. Mos linçoni prokurorët dhe gjyqtarët. Lërini të bëjnë punën e tyre, derisa të vijnë te ju me ato që i keni vjedhur këtij populli”, tha Lamallari.

Deputeti Noka nga vendi e quajti ministrin “idiot”. Në fund të debatit kreu i Grupit Parlamentar të PS-së Balla kërkoi përjashtimin e Nokës për gjuhën e përdorur dhe seanca u ndërpre për 5 minuta./CNA