Debate në Kuvend/ Ibrahimaj-Tabakut: Jeni mësuar me gënjeshtra, nuk ju del matematika

8 Shtator 2022, 12:38, Politikë CNA

Debate në Kuvend/ Ibrahimaj-Tabakut: Jeni mësuar me gënjeshtra,

Deputetja Jorida Tabaku

Deputetja Jorida Tabaku, gjatë fjalës së saj në seancën plenare të ditës së sotme është shprehur se ndryshe nga çfarë deklaron qeveria nuk ka asnjë paketë antikrizë.

Sipas Tabakut, nuk ka asnjë paketë të tillë dhe se sot janë 50 mln euro rutinë me ndryshim buxheti për të cilët nuk përfiton në mënyrë të qëndrueshme asnjë grup.

“Sa herë ka një krizë kjo qeveri fillon dhe ankohet. Nuk mund të ndodhë ndryshe edhe këtë herë. E ka fajin opozita për çdo gjë në këtë vend, edhe pse ka 8 vite në opozitë. Kryeministri flet për ndërtimet pa leje, sikur do t’i prishë këto ndërtime të lejuara po nga këto. Rama tha se këtë vit qeveria shqiptare nuk ka paketë, por është ndryshim normal buxheti. E gjitha është 50 mln euro. Duhet t’i shpjegojë dikush këtij se indeksimi lidhet me normën e inflacionit. Çmimet janë rritur nga 7.5% deri në 29% për disa produkte. Dhe rritjet janë si për mëshirë.

Pse nuk diskutojmë sot për një paketë si të gjitha vendet e tjera. Gjermania ka bërë paketë mbështetëse 65 miliardë. Vende të tjera kanë vendosur çmim tavan për energjinë. A e dëgjuat të flasë për klubin e oligarkëve? A e dëgjuat të flasë për fermerët? Janë të gjitha politika normale! Vetë e pranoi që ‘NUK KA PAKETË’. Nuk përfiton në mënyrë të qëndrueshme asnjë grup! Si mund të rrisësh pagën minimale dhe të mos e ndihmosh biznesin që i shtohet një kosto shumë e madhe në kohë krize.

Sot fatkeqësisht mbi 35% e familjeve shqiptare nuk e përballojnë dot çmimin e energjisë. 16.2% janë vjedhjet në rrjet. Sot flasim për energjinë elektrike të prodhuar në vend. 60% e energjisë elektrike është prodhuar nga privatët. Çfarë ka bërë qeveria shqiptare për diversifikimin e prodhimit të energjisë? Po një park fotovoltaik. Përsëri sot nuk diskutojmë asnjë alternativë. Sot diskutojmë përsëri sikur të jemi 8 vite më parë dhe sikur të kisgim qeverisur ne këtë kohët e fundit. Askush nuk flet për kompanitë e karburanteve që janë përfituesit kryesorë të rritjes së çmimeve. Kemi një bord antikushtetuese që vendos çmimet. Sot diskutojmë për kafshatën. Bëhet fjalë për një rritje 500 lekë për pensionistët, për të kompesuar rritjen deri në 29% të produkteve të shportës. Kjo qeveri nuk kaa bërë asgjë për tu përballuar me krizat”, tha ndër të tjera Tabaku.

Pas deklaratës së Tabakut, reagoi ministrja e Financave Delina Ibrahimaj, e cilia iu përgjigj deputetes së Partisë Demokratike, Jorida Tabaku në lidhje me akuzat për paketën e dytë të rezistencës sociale.

‘Këtë refren akuzash do të dëgjojmë sa kohë që ju nuk dini as të lexoni as të dëgjoni. Flisni për shifra mbështetëse që nuk e di se ku i gjeni, por shifra është 43 mlrd lekë deri tani. Do ta shihini që me paketën që kemi marrë është e duhura. Qytetarët shqiptarë janë mësuar më gënjeshtra tuaja, që jeni mësuar me ulje taksash e rritje rrogash, ku matematika e thjeshtë nuk u del.’- u shpreh Ibrahimaj./ CNA.al