web counter
LEXO PA REKLAMA!

SHKARKO APP

App Store
Google Play

E fundit!

x

Bozdo paralajmëron: Opozita do vijojë aksionin në të gjitha frontet

17 Prill 2026, 19:33, Politikë CNA

Bozdo paralajmëron: Opozita do vijojë aksionin në të gjitha

Deputeti i Partisë Demokratike, Eno Bozdo, deklaroi pak minuta para protestës se opozita do të vazhdojë përpjekjet e saj në çdo drejtim, duke përfshirë parlamentin, terrenin dhe komunikimin me qytetarët.

Ai theksoi se gjatë javës opozita ka ngritur në parlament çështje që shqetësojnë qytetarët, si çmimi i naftës, ndërsa ka zhvilluar edhe takime me grupe interesi.

Sipas tij, edhe kreu i PD-së, Sali Berisha, ka qenë në terren, konkretisht në Berat, ku është takuar me fermerët për problemet e tyre.

Bozdo u shpreh se qëllimi kryesor mbetet largimi i qeverisë dhe se aksioni opozitar nuk do të ndalet derisa kryeministri Edi Rama të japë dorëheqjen.

Duke komentuar efektin e protestave, ai pranoi se ato të vetme mund të mos mjaftojnë, por i konsideroi si pjesë të një strategjie më të gjerë që përfshin përgatitjen për zgjedhjet lokale dhe angazhimin e vazhdueshëm me qytetarët.

Sipas Bozdos, opozita ka fituar më shumë mbështetje në opinionin publik krahasuar me një vit më parë, ndërsa shtoi se edhe ndërkombëtarët, sipas tij, i referohen opozitës për situatën në vend.

Ai ngriti shqetësime për korrupsionin dhe ecurinë e integrimit europian, duke pretenduar se procesi ka ngecur dhe mund të përballet me kushte më të ashpra në të ardhmen.

“Ne vazhdojmë përpjekjet tona opozitare në të gjitha frontet. Na keni parë dje, besoj, në parlament, në një seancë gjithashtu të gjatë. Kemi ngritur gjatë kësaj jave çështjet që shqetësojnë shqiptarët, si dhe takimet me palët e interesit për çështjen e çmimit të naftës. Zoti Berisha para dy ditësh ishte në Berat, në takim me fermerët për hallet dhe problemet e tyre. Komunikimi i Partisë Demokratike vazhdon në çdo front.

E rëndësishme është që të ngremë shqiptarët dhe kjo qeveri duhet të ikë sa më parë. Aksioni i opozitës, që shtrihet në të gjitha mënyrat dhe me të gjitha instrumentet, nuk ndalet derisa Edi Rama të japë dorëheqjen. Kjo është ajo që mund të themi. Ky është një hap më tej drejt objektivit tonë.

Shikoni, për t’iu përgjigjur kësaj pyetjeje, që është pak a shumë një pyetje që e ka përgjigjen, shumë janë skeptikë nëse vlejnë apo jo protestat. Por mos i shikoni protestat të veçuara nga i gjithë aksioni tjetër opozitar i Partisë Demokratike. Ne kemi dalë në terren, flasim me njerëzit, përgatitemi për zgjedhjet lokale, bëjmë takime me qytetarët për të shpjeguar situatën, ruajmë komunikimin publik dhe bëjmë përballjen tonë në parlament.

Protesta është një ndër instrumentet që ne po përdorim në këtë kohë. A do të mjaftojnë protestat? Ndoshta protestat në vetvete nuk mjaftojnë. Por kjo përpjekje, sigurisht, do të dalë me sukses. Unë besoj që, nëse krahasoni çfarë ka qenë Shqipëria një vit më parë dhe rolin që luan opozita sot, opozita sot ka kthyer opinionin publik drejt saj për zgjidhje.

Opinioni publik sot shikon opozitën dhe ka të drejtë të kërkojë më shumë dhe më mirë prej saj. E para. Opinioni ndërkombëtar i referohet tërësisht opozitës. Ne kemi dokumente ndërkombëtare që provojnë katërcipërisht që Shqipëria është e kriminalizuar, qeveria është e kriminalizuar, korrupsioni bën kërdinë gjithandej dhe që shqiptarët nuk mund të vazhdojnë në këtë regjim.

Shikoni që, pavarësisht retorikës së kryeministrit, edhe rruga e integrimit, për fat të keq, ka ngecur. Ka ngecur dhe kam përshtypjen se kushtet do të jenë gjithnjë e më të rënda, një ripërsëritje e vitit 2015–2016. Pra, ne po bëjmë detyrën tonë dhe do të vazhdojmë. Ky është ritmi ynë dhe kjo është rruga që kemi zgjedhur”, tha Bozdo./ CNA





Lajmet e fundit nga