Asambleja e PS në Lushnjë/ Rama: Integrimi, motivi i fushatës tonë të komunikimit

11 Prill 2026, 16:44, Politikë CNA

Asambleja e PS në Lushnjë/ Rama: Integrimi, motivi i fushatës

Kryeministri Edi Rama ka marrë sot pjesë në mbledhjen e Asamblesë së PS-së në Lushnjë. Rama u shpreh se nisja e kësaj fushatë komunikimi ka motiv kryesor negociatat e anëtarësimit.

Rama tha se PS ka vendosur të zhvillojë këto takime për t’i informuar njerëzit për punët e Shqipërisë, të cilat sipas tij nuk pasqyrohen në media.

Ai foli edhe lidhur me pretendimet se ka bllokim të negociatave, ku tha se kjo është e pavërtetë për shkak se çdo gjë po realizohet sipas pikave të planit të Komisionit Europian. Kreu i qeverisë foli edhe lidhur me opozitën, ku tha se janë të vetmit që sipas tij |kanë folur keq për Shqipërinë në institucione europiane”.

“Motivi kryesor i kësaj fushate komunikimi lidhet me momentin që po kalon vendin dhe sfidën historike të hapjes dhe mbylljes së negociatave të anëtarësimit. Kemi vendosur të jemi pranë njerëzve për t'i informuar për punët e vendit për të cilat shohin ose dëgjojnë pak ose aspak në pasqyrat e informimit, ku mbizotëron gënjeshtra dhe sajesa. Të rrish dhe të dëgjosh vetëm keq e zi, diçka ndodh në aspektin e motivimit. Ne nuk kemi mundësi të korrigjojmë të tjerët por vetëm veten dhe të përmirësojmë punën tonë. Për të ndarë me njerëzit se ku jemi dhe ku po ecim.

U tha se u mbyllën negociatat, u mbyllën dyert e BE-së. Nuk ka as bllokim, as ndalim, për shkak se ne po ecim sipas pikave të planit të Komisionit Europian. Negociatatat vazhdojnë. Ajo që është e rëndësishme është që ne mos të humbasim fokusin për shkak të gjithë këtyre zhurmave dhe të mos humbasim sensin e përgjegjësisë historike për të futur Shqipërinë në BE. Është hera e parë që Shqipërisë i ka buzëqeshur kështu fati. Në 11 muaj kemi hapur gjithë kapitujt, si asnjë vend tjetër. Të gjitha vendet që kanë hyrë në BE kanë pasur luftëra të brendshme politike, por s’ka bërë vaki që opozita e atij vendi të shkojë dhe të thotë ndalojini negociatat. Nuk ka ndodh që partitë të shkojnë në rrugët e Europës dhe të shajnë vendin e tyre. Këtë e bëjnë vetëm ato që nuk kemi përballë por vetëm mbrapa. Shkojnë të masakrojnë vendin e tyre”, tha Rama. /CNA