E fundit!

13:58 Aktualitet

SPAK sekuestron pasurinë në pronësinë indirekte të Belinda Ballukut

Prokuroria e Posaçme ka vendosur masën e sekuestrimit pasu...

Debate dhe votime/ Ja çfarë ndodhi dje në Kuvendin e Shqipërisë

10 Prill 2026, 07:53, Politikë CNA

Debate dhe votime/ Ja çfarë ndodhi dje në Kuvendin e

Kuvendi i Shqipërisë u mblodh të enjten nën drejtimin e kryparlamentarit Niko Peleshi, në një seancë plenare shumorëshe, të mbushur me diskutime dhe votime.

Pas miratimit të procesverbalit të seancës plenare të datës 2.4.2026, Peleshi njoftoi se, në Konferencën e Kryetarëve në dt. 7 prill, nuk pati mirëkuptim për caktimin e datës për zhvillimin e një mocioni me debat mbi problematikat e konstatuara nga raporti vjetor i Departamentit të Shtetit mbi klimën e investimeve në Shqipëri dhe gjetjet e progres-raportit të Komisionit Europian.

Pas votimit në seancë, Kuvendi miratoi zhvillimin e mocionit me debat, më 14 maj.

Në vijim të njoftimeve, Peleshi bëri me dije një kërkesë të një grupi prej 7 deputetësh të Grupit parlamentar të PD për interpelancë me Kryeministrin për dhënie informacioni lidhur me vendimmarrjen e Këshillit Kombëtar të Territorit dhe Ujit, kërkesë e cila u rrëzua me shumicë votash.

Kuvendi njoftoi gjithashtu për kërkesën e një grupi prej 36 deputetësh të Grupit Parlamentar të PD-së për shqyrtimin me procedurë të përshpejtuar të projektligjit "Për mekanizmin e reagimit ndaj krizave të furnizimit dhe çmimeve të lëndëve djegëse". Pas votimit kërkesa u rrëzua me shumicë votash.

Pas zhvillimit të interpelancës me ministrin e Bujqësisë dhe Zhvillimit Rural, Andis Salla, kërkuar nga deputeti Erion Braçe punimet plenare vijuan me një seancë pyetje-përgjigjesh me ministren e Arsimit, Mirela Kumbaro, kërkuar nga deputetja Erisa Xhixho.

Seanca vijoi me shqyrtimin e dy projektligjeve dhe tri projektvendimeve, përkatësisht;

Projektligji “Për një shtesë në ligjin nr. 9710, datë 10.4.2007 “Për portet turistike në Republikën e Shqipërisë”, i ndryshuar” u miratua me 76 vota pro 26 kundër 0 abstenim.

Projektligji “Për disa shtesa dhe ndryshime në ligjin nr. 9917, datë 19.5.2008, “Për parandalimin e pastrimit të parave dhe financimit të terrorizmit”, të ndryshuar” u miratua me 76 vota pro 27 kundër 1 abstenim.

Projektvendimi “Për ngritjen e Komisionit Hetimor të Kuvendit, “Për kontrollin e ligjshmërisë së veprimeve të Autoritetit Rrugor Shqiptar për realizimin e investimeve në infrastrukturën rrugore” u rrëzua me 28 vota pro 75 kundër 0 abstenim.

Projektvendimi “Për ngritjen e Komisionit Hetimor të Kuvendit, “Për kontrollin e ligjshmërisë në funksionimin e AKSH, për vlerësimin e sigurisë kibernetike dhe mbrojtjes së të dhënave të qytetarëve, si dhe për analizimin e rreziqeve për sigurinë kombëtare dhe detyrimet e Shqipërisë si vend anëtar i NATO-s” u rrëzua me 28 vota pro 76 kundër 0 abstenim.

Projektvendimi “Për zgjedhjen e një anëtari të Këshillit Mbikëqyrës të Bankës së Shqipërisë” Znj. Olta Rushaj propozohet anëtare në Këshillin Mbikëqyrës të Bankës së Shqipërisë u miratua me 74 vota pro 26 kundër 3 abstenim./CNA